Guvernatori i Floridës Ron DeSantis ka nënshkruar një projektligj që do mandatonte kurrikulën për “rreziqet dhe të këqijat e komunizmit” për fëmijët në kopshte e shkolla. Legjislacioni u nënshkrua në përvjetorin e një përpjekjeje të dështuar të SHBA-së për të rrëzuar kreun komunist kuban Fidel Castro në kulmin e Luftës së Ftohtë.
Ligji, që do hyjë në fuqi në korrik, kërkon që të gjitha shkollat publike të mësojnë historinë e komunizmit në një mënyrë të përshtatshme për moshën, duke filluar nga viti shkollor 2026-2027.
Udhëzimi për komunizmin duhet të sigurojë një histori të lëvizjes brenda dhe jashtë vendit dhe të përqendrohet në mizoritë e perceptuara jashtë vendit. Ai gjithashtu duhet të theksojë “kërcënimin në rritje të komunizmit në Shtetet e Bashkuara dhe aleatët tanë” në shekullin e 20-të, duke përfshirë ngjarjet në Kinë dhe përhapjen e ideologjisë së kuqe në Amerikën Latine dhe Kubë, thotë legjislacioni i ri.
Një nga qëllimet kryesore të kurrikulës thuhet të jetë “përgatitja e studentëve për t’i bërë ballë indoktrinimit të komunizmit në kolegje dhe universitete”, shpjegoi zyra e DeSantis në një deklaratë për shtyp.
Duke mbrojtur legjislacionin, guvernatori theksoi se “ne nuk do lejojmë që nxënësit tanë të jetojnë në injorancë dhe as të indoktrinohen nga apogjetë komunistë në shkolla. Përkundrazi, ne do sigurojmë që nxënësve në Florida t’u mësohet e vërteta për të këqijat dhe rreziqet e komunizmit”.
