Zyrtarët e drejtësisë në Spanjë kanë liruar aksidentalisht nga burgu një miliarder holandez droge në një ngatërresë burokratike.
Karim Bouyakhrichan, që dyshohet se është një udhëheqës i Mafias Mocro, u arrestua në Marbella në janar pas një hetimi pesë-vjeçar për pastrim parash.
Por ai u lirua aksidentalisht mes konfuzionit për një kërkesë holandeze për ekstradim, përpara se të arratisej këtë muaj.
Autoritetet spanjolle mbeten të sigurta se shefi i dyshuar i kartelit do të gjendet.
Duke folur me gazetarët të martën, Ministri i Drejtësisë Félix Bolaños pranoi se arratisja ishte “lajm shqetësues”, por këmbënguli që forcat e sigurisë “do ta dorëzojnë këtë person para drejtësisë sa më shpejt të jetë e mundur”.
Mocro Mafia i referohet disa prej karteleve më të mëdha të trafikut të kokainës në Evropë dhe besohet se ka kontrabanduar miliarda euro të drogës nga Amerika e Jugut në BE gjatë 15 viteve të fundit.
Thuhet se ata përdorin portet e mëdha në Amsterdam dhe Roterdam për të lëvizur kokainën nëpër kontinent, ndërsa drejtojnë operacionet e pastrimit të parave në Evropë, Lindjen e Mesme dhe Marok.
Bouyakhrichan, u arrestua në janar së bashku me pesë burra të tjerë pasi u akuzua për pastrim parash përmes blerjes së 172 pronave në Spanjë me vlerë mbi 50 milionë euro (42.9 milionë funte).
46-vjeçari ishte një nga kriminelët më të kërkuar në Evropë dhe ishte ndjekur nga Interpoli për të paktën pesë vjet.
VINI RE: Ky material është pronësi intelektuale e BBC
