Hegjemonia liberale perëndimore ka dështuar dhe duhet të shkatërrohet, deklaroi të enjten kryeministri hungarez Viktor Orban, duke sugjeruar se mund të përfundojë brenda këtij viti.
Duke iu drejtuar Konferencës së Veprimit Politik Konservator (CPAC Hungari) në Budapest, Orban kritikoi “rendin botëror të bazuar në hegjemoninë progresive liberale”, duke thënë se ai ka krijuar figura të shumta që “nuk janë të aftë për të qenë udhëheqës”, madje edhe “konkurset e bukurisë” dinë më shumë për paqen se sa ata.
Ai akuzoi politikanët liberalë për ndërtimin e “kontrollit ideologjik hegjemonist të cilit të gjithë duhet t’i nënshtrohen”, duke i kthyer “organet shtetërore në mjete shtypjeje”. Forca të tilla janë një armik i rrezikshëm, koha e të cilit po i vjen fundi, pohoi Orban.
“Liberalët progresivë e ndjejnë rrezikun, fundi i kësaj epoke nënkupton edhe fundin e tyre”, argumentoi kryeministri. Mbizotërimi i tyre mund të kapërcehet më shpejt, ndoshta brenda këtij viti, parashikoi Orban, duke përmendur zgjedhjet e ardhshme të Parlamentit të BE-së dhe presidenciale në SHBA.
“Përkrahësit e botës së vjetër janë ulur në Bruksel, dhe megjithëse nuk është puna ime të ndërhyj në politikën amerikane, kam frikë se ata janë ulur edhe në Uashington. Kjo është ajo që ne po bëjmë këtë vit. Këtë vit ne do të përpiqemi t’i dëbojmë ata”, tha kryeministri hungarez.
“Këtë vit, në dashtë Zoti, ne mund t’i japim fund epokës së palavdishme të qytetërimit perëndimor. Ne mund t’i japim fund rendit botëror të ndërtuar mbi hegjemoninë liberale progresive. Fryma progresive liberale botërore ka dështuar. I dha botës luftëra botërore, kaos, trazira dhe shkatërroi ekonomi. Rendi botëror në zhvillim do bazohet në sovranitetin e vërtetë, me vendet që drejtohen nga interesat e tyre aktuale kombëtare dhe jo nga një ideologji globale”, tha Orban.
“Le të kthejmë epokën e sovranitetit, le të kthehemi drejt paqes dhe sigurisë. Le ta bëjmë Amerikën të madhe përsëri, le ta bëjmë Evropën të madhe përsëri”, përfundoi ai.
