Partia Demokratike i është përgjigjur sulmeve të Ilir Metës kundrejt Lulzim Bashës. PD ka zgjedhur që të risjellë një video, ku Sali Berisha dhe Ilir Meta hedhin akuza ndërmjet njëri-tjetrit.
‘E dhashë prej Shkëlzenit unë dorëheqjen, se ishte në videon e Dritan Priftit dhe ti e di shumë mirë.’- i thotë Meta Berishës.
‘Ilir Meta është njeriu që përfaqëson klanin më të rrezikshëm të trafiqeve në Shqipëri!’- janë disa nga akuzat e Berishës për Metën.
Mirela Karabina zëdhënëse e PD-së, thotë se hallet e Metës nuk janë e s’do të jenë hallet e Shqipërisë.
‘Ky është Ilir Meta ose Ilir Metaj. Koha kur ai ushqehej me “gjakun” e demokratëve ka marrë fund. Hallet e tij nuk janë dhe nuk do të jenë kurrë hallet e Shqiptarëve.’- shkruan Mirela Karabina.
Gjatë konventës së Partisë së Lirisë, Ilir Meta nuk nguroi që të hedhë akuza në drejtim të Lulzim Bashës, për të cilin tha me vulën pa parti ka marrë 1 milionë euro nga buxheti i shtetit.
