Të ardhurat e Kanalit të Suezit kanë rënë me 50% mes tensioneve në rritje në Detin e Kuq, tha të dielën ministri i Planifikimit i vendit afrikanoverior.
“Rënia u shkaktua nga një ndërprerje në transportin detar për shkak të tensioneve në Detin e Kuq,” tha Hala El-Saeed në një fjalim në margjinat e Forumit Ekonomik Botëror në Riad, Arabi Saudite.
Kanali i Suezit, një rrugë detare jetike për tregtinë globale, është rruga më e shkurtër e anijeve midis Evropës dhe Azisë. Është një nga burimet kryesore të valutës së huaj për Egjiptin.
Tranzitet përmes rrugës ujore ndërkombëtare u prekën nga tensionet në Detin e Kuq mes sulmeve të rebelëve Houthi ndaj anijeve tregtare të lidhura me Izraelin dhe sulmeve ajrore hakmarrëse të SHBA-së.
Tensionet janë përshkallëzuar në gjithë rajonin e Lindjes së Mesme mes një ofensive vdekjeprurëse izraelite në Rripin e Gazës, që ka vrarë më shumë se 34,400 njerëz dhe plagosur mijëra të tjerë që nga një sulm i Hamasit më 7 tetor, i cili vrau afro 1,200 njerëz dhe ku u morën mbi 200 pengje.
Më shumë se gjashtë muaj pas luftës izraelite, sipërfaqe të gjera të Gazës janë në rrënoja, duke shtyrë 85% të popullsisë së enklavës në zhvendosje të brendshme mes një bllokade gjymtuese të ushqimit, ujit të pastër dhe ilaçeve, sipas OKB-së.
