Rregullat e reja që shtrëngojnë kufizimet e qeverisë kineze ndaj kompanive të internetit të vendit kanë hyrë në fuqi sot.
Ligji i zgjeruar i Sekreteve Shtetërore i detyron firmat, duke përfshirë gjigantët e mediave sociale Tencent, ByteDance dhe Weibo, të ndërmarrin veprime nëse përdoruesit postojnë informacione me përmbajtje sensitive.
Ai kërkon që “operatorët e rrjetit” të monitorojnë informacionin që shpërndahet nga përdoruesit. Rregullat gjithashtu përshkruajnë se si duhet të hiqen postimet, të ruhen të dhënat dhe të raportohen tek autoritetet.
Ky është përditësimi i parë i ligjit në më shumë se një dekadë dhe është në përputhje me fokusin e Presidentit Xi Jinping në sigurinë kombëtare, ndërsa qeveria godet industrinë e gjerë të teknologjisë të Kinës.
Kur rregullat e reja u shpallën për herë të parë në shkurt, një zyrtar i Administratës Kombëtare të Mbrojtjes së Sekreteve Shtetërore i tha agjencisë shtetërore të lajmeve Xinhua se ato ishin të nevojshme pasi “ruajtja e sekreteve shtetërore përballet me probleme dhe sfida të reja në epokën e re”.
Ndërsa kompanitë e internetit në Kinë tashmë janë subjekt i rregullave strikte, ndryshimet “vendosin një standard të ri për vetë-monitorim aktiv dhe bashkëpunim të shpejtë”, tha profesori i drejtësisë me bazë në Hong Kong, Ryan Mitchell.
Rregullat e rishikuara zgjerojnë gjithashtu përkufizimin e asaj që mund të konsiderohet si informacion i ndjeshëm për të përfshirë “sekretet e punës”, ose informacionin në lidhje me vendimmarrjen e agjencive shtetërore, të cilat mund të jenë veçanërisht problematike për gazetarët, përfshirë korrespondentët e huaj.
Këshilli i Çështjeve Kontinentale të Taipeit tha se legjislacioni është “shumë i paqartë dhe mund t’i bëjë njerëzit të shkelin ligjin në çdo kohë”.
Firma juridike ndërkombëtare Baker McKenzie FenXun tha se ndërsa përkufizimi i asaj që konsiderohet sekret shtetëror është “i gjerë dhe i paqartë”, ai nuk duhet të ketë një ndikim thelbësor në kompanitë shumëkombëshe që operojnë në Kinë.
Rregulloret e reja vijnë pasi gjigandi i mediave sociale TikTok dhe kompania e tij mëmë kineze ByteDance, po përballen me një kontroll të shtuar në SHBA dhe vende të tjera perëndimore.
Megjithatë, rregullat e reja “nuk duket se janë të orientuara kryesisht drejt rregullimit të operacioneve jashtë shtetit të firmave kineze”, tha zoti Mitchell.
VINI RE: Ky material është pronësi intelektuale e BBC
