Donald Trump ka akuzuar administratën e presidentit amerikan Joe Biden se është njësoj me policinë sekrete naziste për ta penguar atë të fitojë zgjedhjet e këtij viti.
“Këta njerëz po drejtojnë një administratë Gestapo,” u tha ish-udhëheqësi amerikan donatorëve republikanë në një ngjarje në Florida të shtunën, sipas audios së ndarë me media të shumta kombëtare të lajmeve.
“Dhe kjo është e vetmja gjë që ata kanë. Dhe kjo është mënyra e vetme që ata të fitojnë, sipas mendimit të tyre.”
Trump po përballet me katër çështje penale, përfshirë një gjyq të vaijueshëm në Nju Jork për keqraportimin e tij të pretenduar të pagesave të “parave të fshehta” për yllin porno Stormy Daniels.
Përveç çështjes së Nju Jorkut, ish-presidenti dhe kandidati i supozuar republikan për të sfiduar Biden këtë nëntor përballet me dy raste federale në lidhje me nxitjen e supozuar të tij të trazirave të 6 janarit 2021, në Capitol Hill dhe keqpërdorimin e tij të dyshuar të dokumenteve të klasifikuara. Ai gjithashtu përballet me akuza shantazhi në nivel shtetëror në Xhorxhia për përpjekjet e tij të supozuara për të sfiduar fitoren elektorale të Biden në shtet në vitin 2020.
Trump i ka etiketuar katër rastet si pjesë e të njëjtit komplot të orkestruar nga demokratët për ta nxjerrë atë nga gara për Shtëpinë e Bardhë. Për gati tre javë, gjyqi në Nju Jork e ka ndalur efektivisht fushatën e Trump, duke e detyruar republikanin të heqë dorë kryesisht nga tubimet e tij të zakonshme për fjalime më të shkurtra në shkallët e gjykatës.
“Por kjo nuk më shqetëson”, vijoi Trump.
Megjithatë, Trump filloi një batare akuzash kundër prokurorit të qeverisë Jack Smith, i cili po mbikëqyr dy rastet federale kundër tij. Smith, tha Trump, është “jotërheqës si brenda ashtu edhe jashtë”, është “i çmendur” dhe “një bandit i keq”.
E shtuna nuk ishte hera e parë që Trump e krahason Biden me tiranët e shekullit të 20-të. Në një fjalim në Konferencën e Veprimit Politik Konservator (CPAC) në Teksas në fillim të këtij viti, ai kritikoi “gjyqet sipas stilit stalinist që po kryheshin me urdhër të Joe Biden” dhe në një reklamë të fushatës vitin e kaluar, e përshkroi Bidenin si “të diktatorin e tretë më të korruptuar në botë”.
Nga ana tjetër, Trump ka thënë se do ishte “një diktator” për një ditë nëse do zgjidhej dhe do përdorte urdhra ekzekutivë për të rifilluar nxjerrjen e karburanteve fosile amerikane dhe për të dëbuar miliona emigrantë të paligjshëm.
Veprimtaria e së shtunës u ndoq nga një mori kandidatësh të mundshëm të Trump, duke përfshirë senatorin e Karolinës së Jugut Tim Scott, Kongresmenen e Nju Jorkut Elise Stefanik, Senatorin e Ohajos JD Vance dhe Guvernatoren e Dakotës së Jugut, Kristi Noem. Sipas New York Times, fjalimi i Trump u pasua nga një konferencë në të cilën ndihmësit e tij të lartë të fushatës prezantuan shtetet e Pensilvanisë, Miçiganit, Wisconsin, Minesota dhe Virxhinia si fushëbeteja kryesore në zgjedhjet e nëntorit.
Ata vunë në dukje se pavarësisht nga shpenzimet e fushatës së tij më pak se ajo e Biden, Trump kryeson ndaj demokratit në shumicën e sondazheve të opinionit. Një sondazh i CNN i botuar javën e kaluar tregoi se ai kryesonte ndaj Biden me një diferencë prej 49%-43%, me gjashtë në dhjetë të anketuar që nuk e miratonin punën e Biden si president.
