Këshilltari për sigurinë kombëtare të Shtëpisë së Bardhë ka sugjeruar se forcat ruse mund të përgatisin një përparim në shkallë të gjerë në qytetin ukrainas të Kharkovit, pasi Kievi akuzoi Moskën për rinisjen e vepromtarisë së saj ushtarake në rajon.
Ministria e Mbrojtjes e Ukrainës dhe presidenti Vladimir Zelensky pretenduan të premten se Rusia kishte sulmuar disa pozicione përgjatë kufirit të saj me rajonin e Kharkovit.
Zëdhënësi i Këshillit të Sigurisë Kombëtare të Shtëpisë së Bardhë, John Kirby, u tha gazetarëve më vonë gjatë ditës se Uashingtoni është i shqetësuar se Moska mund të përgatisë një ofensivë të madhe në qytetin e dytë më të populluar të Ukrainës.
“Është e mundur që rusët po përgatiten për një sulm më të madh në Kharkov,” tha Kirby në një konferencë virtuale për shtyp.
Moska nuk ka dhënë informacion mbi veprimet e saj pranë Kharkovit, përveç raportimit për kapjen e dy fshatrave në kufirin e rajonit me Republikën Popullore të Luganskut të Rusisë.
Gjatë muajve të fundit, forcat ukrainase kanë përdorur Kharkovin si një trampolinë për të nisur sulme me dron, artileri dhe raketa në rajonet kufitare ruse, kryesisht në Belgorod, dhe për të organizuar përpjekje të shumta të pasuksesshme për të thyer kufirin.
Të premten, SHBA njoftoi një paketë tjetër ndihme ushtarake prej 400 milionë dollarësh, e treta në javët e fundit. Uashingtoni miratoi gjithashtu shitjen emergjente të tre sistemeve HIMARS me vlerë rreth 30 milionë dollarë, që do financohen nga Gjermania.
