Policia elitare franceze është në kërkim të personave të armatosur që sulmuan një furgon burgu në Normandi, duke vrarë të paktën dy oficerë burgu dhe duke liruar të burgosurin e sigurisë së lartë që po transportonin.
Kryeministri francez, Gabriel Attal, i tha parlamentit se dy oficerë burgu u vranë dhe tre të tjerë u plagosën rëndë në pritën në një autostradë. Attal tha se sulmi kishte shënjestruar republikën franceze dhe sistemin e drejtësisë.
“I gjithë vendi është i tronditur nga ky sulm i dhunës së paprecedentë,” tha ai pasi parlamenti mbajti një minutë heshtje për oficerët.
Sulmi ndodhi rreth orës 11 të mëngjesit në Incarville në rajonin Eure të Normandisë. Një i burgosur i sigurisë së lartë po transportohej nga një gjykatë në Rouen në një burg në Evreux.
Një burim policor tha se disa persona, të cilët mbërritën me dy automjete, përplasën furgonin e policisë dhe u larguan.
Njëri ka mbetur i plagosur, ka thënë burimi policor.
Mediat franceze raportuan se burrat ishin të veshur me të zeza, të veshur me kapuç dhe të armatosur rëndë, përcjell The Guardian.
Nuk ishte e qartë se sa sulmues ishin. I burgosuri u arratis me ta, ndërsa njëra nga makinat e tyre u gjet e djegur.
Prokurorja e Parisit Laure Beccuau e quajti të burgosurin e arratisur si Mohamed Amra, i lindur në vitin 1994, duke thënë se javën e kaluar ai ishte dënuar për grabitje të rëndë dhe gjithashtu ishte akuzuar për një rast rrëmbimi me pasojë vdekjeje.
“Po bëhet gjithçka për të gjetur autorët e këtij krimi,” shkroi presidenti Emmanuel Macron në X. “Ne do të jemi të pakompromis”.
Ministri i Drejtësisë, Éric Dupond-Moretti, tha: “Absolutisht do të bëhet gjithçka për të gjetur autorët e këtij krimi të neveritshëm. Këta janë njerëz për të cilët jeta nuk do të thotë asgjë. Ata do të arrestohen, gjykohen dhe ndëshkohen sipas krimit që kanë kryer.”
Ai tha se njëri nga oficerët e burgut që u vra ishte i martuar me dy fëmijë, ndërsa tjetri la një grua që ishte shtatzënë në muajin e pestë.
Dupond-Moretti tha se asnjë oficer burgu nuk ishte sulmuar në këtë mënyrë në Francë që nga viti 1992.
Alexandre Rassaert, kreu i këshillit të rajonit të Eure, tha: “Jam i ngrirë nga tmerri nga masakra e vërtetë që ndodhi në tollonin e Incarville. Shpresoj me gjithë zemër që ekipi komando i vrasësve që kreu këtë sulm të përgjakshëm do të arrestohet shpejt.”
Ndërkohë edhe një njësi e forcave speciale të policisë GIGN është dërguar për kapjen e të dyshuarve.
