Administrata e presidentit amerikan Joe Biden ka rritur tarifat për 18 miliardë dollarë importe nga Kina, njoftoi Shtëpia e Bardhë të martën.
“Praktikat e padrejta tregtare të Kinës në lidhje me transferimin e teknologjisë, pronësinë intelektuale dhe inovacionin po kërcënojnë bizneset dhe punëtorët amerikanë”, thuhet në një deklaratë.
“Kina po përmbyt gjithashtu tregjet globale me eksporte artificialisht me çmime të ulëta.”
Administrata pretendoi se qeveria kineze ka përdorur “praktika të padrejta, jo të tregut”, ndërsa “transferimet e detyruara të teknologjisë dhe vjedhja e pronës intelektuale” kanë kontribuar në kontrollin e saj të deri në 90% të prodhimit global për inputet kritike të nevojshme për teknologjitë dhe infrastrukturën amerikane, energjinë dhe kujdesin shëndetësor.
Praktika të tilla kanë krijuar “rreziqe të papranueshme” për zinxhirët e furnizimit dhe sigurinë ekonomike të SHBA-së, shtoi deklarata.
Masat e reja përfshijnë rritjen e tarifave për disa produkte çeliku dhe alumini nga 0-7,5% në 25% këtë vit, gjysmëpërçuesit nga 25% në 50% deri vitin e ardhshëm, automjetet elektrike (EV) nga 25% në 100% këtë vit, grafitet natyrore dhe magnetet nga 0% në 25% në 2026, dhe disa minerale të tjera kritike nga 0% në 25% këtë vit.
Për më tepër, tarifa për bateritë litium-jon të makinave elektrike do rritet nga 7.5% në 25% në 2024, ndërsa tarifa për bateritë litium-jon jo për makinat elektrike do rritet nga 7.5% në 25% në 2026, dhe tarifa në pjesët e baterive do rritet nga 7.5% në 25% në 2024.
Për më tepër, tarifa për qelizat diellore, qofshin të montuara në module apo jo, do rritet nga 25% në 50% këtë vit, sipas Shtëpisë së Bardhë.
