Menaxheri më i madh i aseteve në botë, BlackRock po i afrohet marrjes së drejtimit të fondit më të madh të Bitcoin në botë, pasi skepticizmi fillestar i menaxherit të aseteve mbi kriptovalutat i hap rrugën ambicieve për t’u bërë një lojtar i rëndësishëm në tregun e aseteve dixhitale.
Fondi i tregtuar i shkëmbimit të Bitcoin të grupit amerikan ka grumbulluar 16.7 miliardë dollarë aktive që nga fillimi i tij katër muaj më parë, duke e lënë atë më pak se 1 miliardë dollarë prapa udhëheqësit të tregut Grayscale, i cili e ka nisur investimin 10 vjet më parë dhe ka 28 miliardë dollarë aktive.
Krahas kësaj, BlackRock ka nisur gjithashtu fondin e thesarit me rritje më të shpejtë, të cilin fondet mbrojtëse të kriptove dhe themeluesit e tregut kanë filluar ta përdorin si kolateral për tregtimin e monedhave dhe tokenave.
Lëvizjet janë një ndryshim i mprehtë, i nxitur nga rritja e interesit të klientëve dhe rritja e shpejtë në asetet dixhitale, nga vetëm shtatë vjet më parë kur shefi ekzekutiv Larry Fink e quajti Bitcoin “një indeks i pastrimit të parave”.
Në prezantimin në janar të spotit ETF, Fink e përshkroi veten si “shumë optimist për qëndrueshmërinë afatgjatë të Bitcoin” dhe tha se bazat e tij ishin një pjesë thelbësore e “revolucionit teknologjik në tregun financiar”.
“BlackRock ka qenë gjithmonë i përgjegjshëm ndaj interesave të klientëve të tij, kështu që ska pse kriptoja të ishte ndryshe,” tha Lee Reiners, një ligjërues në “Qendrën e Ekonomisë Financiare Duke”. “Megjithatë, kjo nuk do të thotë se ata kanë besim të plotë. Kriptot nuk janë në bilancin e tyre dhe nëse ajo shkon në zero, ndikimi në financat e tyre do jetë i papërfillshëm.”
Kompania që menaxhon miliarda dollarë asete ka qenë përfituesi më i madh nga vendimi i Komisionit të Letrave me Vlerë në janar për të miratuar ETF-të që investojnë drejtpërdrejt në Bitcoin, pasi i kundërshtoi ato për vite.
Fidelity ka mbajtur vendin e tretë, duke tërhequr 9.3 miliardë dollarë aktive. Dyshja janë ndihmuar nga vërshimet e mëdha në Grayscale, e cila konvertoi një produkt të mëparshëm Bitcoin në një ETF dhe kishte vendosur një tarifë shumë më të lartë menaxhimi prej 1.5 përqind. BlackRock tarifon 0.25 për qind.
Kompania gjithashtu bie në kontrast me qasjen e ndërmarrë nga disa prej rivalëve më të mëdhenj të BlackRock. Vanguard – si BlackRock, një gjigant në ETF – jo vetëm që zgjodhi të mos lëshonte një ETF Bitcoin, por gjithashtu kundërshtoi të shesë ndonjë fond Bitcoin të palëve të treta klientëve të tij të ndërmjetësimit.
Besimi në rritje i BlackRock në tregun e aseteve dixhitale theksohet gjithashtu nga mbështetja e tij për Securitize, duke u bashkuar me Tradeëeb dhe Hamilton Lane në një tur mbledhjeje fondesh prej 47 milionë dollarësh për platformën, që përdor mjetet dixhitale për të përfaqësuar asetet. Kreu global i partneriteteve strategjike të ekosistemit të BlackRock, Joseph Chalom, tani është në bordin e Securitize.
Dy vjet më parë BlackRock ndërmori një investim në Circle, që drejton monedhën e dytë më të madhe të qëndrueshme në botë, USDC. Një stablecoin është një lloj monedhe dixhitale e lidhur me një monedhë sovrane, siç është dollari amerikan.
“Tashmë po mblidhen të gjitha pjesët e mozaikut, por do shpresoja që të kuptohet se ka qenë një udhëtim shumëvjeçar, i qëllimshëm për sjelljen e së njëjtës cilësi institucionale që e dallon BlackRock në këtë ekosistem dhe për ne kjo është më e rëndësishme sesa nxitimi,” tha shefi operativ i Blackrock Rob Goldstein për Financial Times.
Megjithatë, futja e BlackRock në pjesë të tjera të tregut të kriptove ka energjizuar investitorët. Në mars, ajo nisi një fond të thesarit të tokenizuar në një blockchain publik, Ethereum, duke i lejuar të gjithë përdoruesit të ndjekin tregtitë në një libër dixhital. Tashmë fondi i likuiditetit dixhital institucional BlackRock USD, ose Buidl, ka kaluar fondin e shënjuar të rivalit Franklin Templeton si më i madhi i tregut, duke tërhequr 382 milionë dollarë krahasuar me 368 milionë dollarë në Franklin.
Tregtarët dhe agjentët kryesorë kanë filluar të përdorin Buidl si një mënyrë për të marrë kolateral me cilësi të lartë për tregtimin e kriptomonedhave. Shumica përdorin monedha të qëndrueshme si USDC ose USDT e Tether, por ato nuk u ofrojnë mbajtësve rendiment, ndryshe nga Buidl.
Por të tjerë thonë se basti afatgjatë i BlackRock është të përshpejtojë zgjidhjen e marrëveshjeve dhe transferimin e fondeve të tyre, duke i bërë ato më tërheqëse për investitorët që duan të aksesojnë paratë e tyre menjëherë.
Menaxheri i aseteve kishte testuar më parë tokenizimin duke përdorur një blockchain privat JPMorgan për të gjurmuar asetet dhe transaksionet që përfshijnë një fond të veçantë të tregut të parave, tha Robert Mitchnick, kreu i aseteve dixhitale të BlackRock. Produkt privat blockchain ndihmoi në vendosjen e bazave për Buidl.
“Ajo punë ishte jashtëzakonisht e rëndësishme. Ne besojmë se mundësia më e madhe në këtë hapësirë ishte rreth blockchaineve publike, “ tha Mitchnick.
Në fund të muajit, SHBA do fillojë të kërkojë që shumica dërrmuese e tregtimeve të shlyhen brenda një dite pune, por drejtuesit dyshojnë se mund të bëhen përparime të mëtejshme për investitorët derisa pjesë të mëdha të sistemit financiar të vendosen në blockchaine, të cilat mund të zgjidhin marrëveshjet në pak minuta.
“Do vijë një çast kur konfigurimi aktual i teknologjisë nuk do funksionojë,” tha Ralf Kubli, një anëtar bordi në Casper Association, një projekt blockchain me bazë në Zvicër.
Menaxherët e aseteve të mëdha në mbarë botën “po mendojnë shumë thellë se çfarë mund të bëjë kjo teknologji për ta”, shtoi ai.
VINI RE: Ky material është pronësi intelektuale e Financial Times
Përgatiti për Hashtag.al, Klodian Manjani
