Udhëtimi i parë i Presidentit rus Vladimir Putin jashtë vendit pas betimit për një mandat të pestë do ketë ndalesa në Pekin dhe Harbin, së bashku me diskutimet e marrëdhënieve dypalëshe me homologun e tij kinez Xi Jinping, tha ndihmësi i Putinit, Yury Ushakov.
Moska njoftoi të hënën se Putin do vizitojë Kinën më 16-17 maj me ftesë të presidentit kinez Xi. Të dy udhëheqësit do shënojnë 75 vjetorin e marrëdhënieve diplomatike midis Moskës dhe Pekinit.
“Do ketë një shkëmbim të thellë pikëpamjesh për çështjet e ndërveprimit në organizata dhe struktura të ndryshme ndërkombëtare, përfshirë OKB-në, ku Rusia dhe Kina janë në solidaritet për pothuajse të gjitha temat në axhendën e OKB-së”, tha Ushakov.
“Është shumë e rëndësishme në rrethanat e tanishme që partneriteti ynë të tregojë se është i qëndrueshëm ndaj çdo ndërhyrjeje të jashtme,” vuri në dukje ndihmësi i Kremlinit.
Putin shkon në Pekin saktësisht dhjetë ditë pas betimit, njësoj siç bëri Xi kur vizitoi Moskën në mars 2023.
“Fakti që ky është udhëtimi i parë jashtë vendit i Putinit pas betimit të javës së kaluar është një mesazh i qartë për rëndësinë e marrëdhënieve ruso-kineze, si dhe “kiminë personale që është zhvilluar midis dy udhëheqësve”, shtoi Ushakov.
Rusia vlerëson pozicionin e ekuilibruar të Kinës për krizën e Ukrainës, tha Ushakov, duke përfshirë kundërshtimin e Pekinit për një konferencë të organizuar nga Zvicra që synonte të diskutonte propozimet e paqes në Ukrainë.
Pikat e tjera në axhendë përfshijnë lidhjen e proceseve të integrimit në Bashkimin Euroaziatik me nismën e Kinës “Një Brez, Një Rrugë”, bashkëpunimi brenda kornizës së BRICS, luftës në Ukrainë dhe Lindjen e Mesme dhe çështjet në Azinë qendrore dhe verilindore.
Putin do shoqërohet nga ish-ministri i Mbrojtjes Sergey Shoigu dhe pasardhësi i tij i caktuar Andrey Belousov, të cilët pritet të marrin pjesë në bisedimet “joformale” me kreun kinez dhe ndihmësit e tij.
Ndër anëtarët më të shquar të delegacionit të rangut të lartë të drejtuar për në Kinë janë edhe ministri i Jashtëm Sergej Lavrov dhe kryetarja e Bankës së Rusisë, Elvira Nabiullina.
