Britania do shpenzojë më shumë se 10 miliardë stërlina (12.70 miliardë dollarë) për kompensimin e mijëra njerëzve që u trajtuan me gjak të kontaminuar me HIV ose hepatit C në vitet 1970 dhe 1980, raportoi Sunday Times.
Skandali i gjakut të infektuar shihet gjerësisht si një nga fatkeqësitë më të rënda të trajtimit në historinë e Shërbimit Shëndetësor Kombëtar të financuar nga shteti.
Rreth 30,000 njerëzve iu dha gjak i infektuar, me rreth 3,000 prej tyre që besohet se kanë vdekur. Shumë jetë të tjera janë prekur nga sëmundjet dhe disa prej të infektuarve nuk janë gjetur kurrë.
Viktimat dhe familjet e tyre ende po bëjnë thirrje për drejtësi, kompensim dhe përgjigje se si u lejua të ndodhte pavarësisht paralajmërimeve për rreziqet. Gjaku dhe produktet e gjakut, disa prej të cilave u importuan nga Shtetet e Bashkuara, u jepeshin njerëzve që kishin nevojë për transfuzion ose si trajtim për hemofilinë.
Përpara publikimit të një raporti hetimor të pavarur të hënën, Sunday Times tha se kryeministri Rishi Sunak do kërkonte falje zyrtare. Qeveria do shpallte më pas një paketë kompensimi qysh të martën.
“Unë mendoj se ky është skandali më i rëndë me të cilin jam përballur gjatë jetës sime,” tha ministri i Financave Jeremy Hunt për gazetën.
“Mendoj se familjet kanë të drejtë të jenë tepër të zemëruar që brezat e politikanëve, përfshirë edhe mua kur isha Ministër i Shëndetësisë, nuk kanë vepruar shpejt për të adresuar skandalin”.
Ai nuk konfirmoi koston ose marrëveshjet e financimit të skemës së kompensimit. Ish-kryeministri David Cameron në vitin 2015 kërkoi falje për skandalin pas një raporti për ndikimin e tij në Skoci. Në vitin 2017, nën kryeministren Theresa May, qeveria shpalli hetimin publik.
Hetimi do publikojë gjetjet e tij të hënën, duke pasur parasysh pyetjet, përfshirë nëse trajtimet e kontaminuara duhet të ishin ndalur më shpejt dhe nëse kishte përpjekje për të mbuluar problemin.
Qeveria ka paguar tashmë 100,000 paund kompensim të përkohshëm për disa viktima me një kosto të vlerësuar prej rreth 400 milionë stërlinash, pas një rekomandimi nga hetimi në vitin 2022.
VINI RE: Ky material është pronësi intelektuale e Reuters
