Babë e bir janë arrestuar në Lushnjë pasi akuzohen se shisnin kokainë e heroinë pranë shkollave e në lokale të ndryshme.
Ata janë ndaluar si pjesë e operacionit “Tempulli” që vijon prej muajsh tashmë.
Në pranga kanë rënë 61-vjeçari I.B dhe 32-vjeçari me iniciale V.B.
Gjatë kontrollit bë banesë atyre u janë kapur 420 doza heroinë, 77 doza kokainë, peshore elektronike, 3 celularë si dhe vlerë monetare që dyshohet se është fituar përmes shitjes së drogës.
Njoftimi
“Vijon megaoperacioni policor i koduar “Tempulli”. Siguronin droga të forta, kokainë dhe heroinë, i përpunonin dhe i ndanin në doza në banesë, me qëllim shitjen në afërsi të shkollave, në lokale dhe ambiente të ndryshme, vihen pranga babë e bir. Sekuestrohen 420 doza heroine, 77 doza kokaine, një sasi lënde e dyshuar si përzierës i lëndëve narkotike, 2 peshore elektronike, vlerë monetare që dyshohet të jetë përfituar nga kjo veprimtari kriminale dhe 3 celularë.
Shërbimet e Komisariatit të Policisë Lushnjë, në kuadër të megaoperacionit policor antidrogë “Tempulli”, dhe pas informacioneve të siguruara në rrugë operative se në lagjen “Skënder Libohova”, Lushnjë, organizohej veprimtaria kriminale e prodhimit dhe shitjes së narkotikëve, menjëherë kanë organizuar punën për goditjen e kësaj veprimtarie. Për këtë rast u kapën në banesë duke pregatitur doza të lëndëve të dyshuara narkotike heroinë dhe kokainë, shtetasi I. B., 61 vjeç, dhe djali i tij, shtetasi V. B., 32 vjeç, të dy banues në Lushnjë.
Në vijim të veprimeve të kryera nga Sektori për Hetimin e Narkotikëve të DVP Fier u bë i mundur arrestimi i dy shtetasve të mësipërm, pasi dyshohet se në bashkëpunim me njëri-tjetrin, organizonin punën për pregatitjen dhe shitjen e lëndëve narkotike. Në cilësinë e provës materiale u sekuestruan dozat e lëndës narkotike, 2 peshore elektronike, vlera monetare dhe 3 celularë. Vijon puna nga shërbimet e Komisariatit të Policisë Lushnjë në bashkëpunim me Sektorin për Hetimin e Narkotikëve në DVP Fier, për zbardhjen e plotë të këtij rasti, identifikimin dhe kapjen e personave te tjerë që mund të jenë përfshirë në këtë rast. Materialet procedurale i kaluan Prokurorisë, për veprime të mëtejshme.”
