Presidenti i Partisë së Lirisë, Ilir Meta, ka kritikuar ashpër rezolutën antikorrupsion të miratuar nga Partia Socialiste me 76 vota në Kuvend.
Gjatë një konference për shtyp, Meta e konsideroi këtë rezolutë si një përpjekje për shpëtimin e kryeministrit Edi Rama, të cilin e akuzoi për korrupsionin e përhapur që ka prekur vendin gjatë 11 viteve të qeverisjes së Partisë Socialiste.
Meta theksoi se Rama është përgjegjësi kryesor për situatën aktuale të korrupsionit galopant në Shqipëri, duke sugjeruar se rezoluta është një manovër për të shmangur përgjegjësinë reale.
“Shikoni të gjithë treguesit që kur ka ardhur ai në pushtet sesi janë. Jemi vendi i parë në Europë pas Rusisë, vendi i dytë në botë për ryshfet pas Zambias, për shkak të korrupsionit të tij.
Nuk ka patur ndonjë reagim të ndonjë institucioni ndërkombëtar sesi janë shpenzuar fondet e donatorëve për tërmetin dhe pandeminë. Vetëm në rastin e Shqipërisë është kërkuar transparencë pasi ka pasur bindje të qartë për hajdutëri të paparë edhe në kohë pandemie dhe fatkeqësie”-tha Meta.
Meta tha se opozita do të vijojë aksionin e saj përmes protestave si kundër qeverisë edhe kundër kryebashkiakut të Tiranës, Erion Veliaj.
‘Ai ta gëzojë korrupsionin, detyra e opozitës është të vijojë betejën pa kompromis në Parlament dhe bashkinë e Tiranës. Falënderoj ata që kanë protestuar atje për ta shporrur mostrën e ‘5D’. Betejë e pandalshme deri në çrrënjosjen e këtij regjimi. Ky regjim do të bjerë në greminë, do një të shtyrë dhe ne nuk do t’ia kursejmë.’
Por kreu i PL shprehu rezerva për mënyrën si aleatët e tij në opozitë po organizohen për të rrëzuar, të ashtuquajturin regjimi i Ramës. Sipas tij, ata duhet të ndjekin shembullin e Partisë së Lirisë për të bërë betejën sa më efikase.
‘Partia e Lirisë është në krye të aksionit opozitar çdo ditë. E ka nisur nga vetja duke përmirësuar organizimin e saj dhe është e rëndësishme ta bëjë gjithë opozita përballë kësaj makineri mafioze. Kjo kërkon organizim më të mirë dhe efikas sesa deri tani”-tha Meta.
