Juristët në gjyqin penal të Donald Trump për paratë e pretenduara të dhënandaj yllit të filmave porno Stormy Daniels filluan diskutimet të mërkurën, duke u tërhequr pas dyerve të mbyllura për të peshuar provat dhe dëshmitë që kanë dëgjuar dhe parë gjatë pesë javëve të fundit.
Nuk ishte e sigurt se sa kohë mund t’u duhej juristëve për të marrë një vendim në gjyqin e parë penal ndaj një presidenti të SHBA-së.
Trump, 77 vjeç, akuzohet për falsifikimin e dokumenteve të biznesit për të mbuluar një pagesë të heshtur ndaj një ylli porno pak para zgjedhjeve presidenciale të 2016-ës. Ai është deklaruar i pafajshëm dhe ka mohuar çdo akuzë.
“Edhe Nënë Tereza nuk mund t’i mposhte këto akuza. E gjitha kjo është e manipuluar kryekëput,” u tha ai gazetarëve jashtë sallës së gjyqit, duke iu referuar fituesit së Çmimit Nobel për Paqe.
Pak para se të fillonin diskutimet, gjyqtari që mbikëqyrte gjyqin u tha juristëve se ata nuk mund të mbështeten vetëm në dëshminë e dëshmitarit Michael Cohen, i cili luajti një rol qendror në pagesën e parave të pretenduara për Daniels.
Gjykatësi Juan Merchan u tha anëtarëve të jurisë që të aplikonin një kontroll shtesë ndaj Cohen, sepse ai dëshmoi se ishte i përfshirë drejtpërdrejt në përpjekjet e supozuara të Trump për të mbuluar pagesën ndaj yllit porno Stormy Daniels pak para zgjedhjeve të 2016-ës.
“Edhe nëse ju duket se dëshmia e Michael Cohen është e besueshme, ju nuk mund ta dënoni të pandehurin vetëm mbi atë dëshmi, përveç nëse gjeni se është vërtetuar nga prova të tjera,” tha Merchan.
Komentet e Merchan ishin pjesë e udhëzimeve të tij të hollësishme për 12 anëtarët e jurisë dhe 6 zëvendësit e tyre, të cilët janë ulur në heshtje në një sallë gjyqi në Nju Jork për javë të tëra, ndërsa prokurorët parashtronin çështjen e tyre dhe avokatët e Trump u përpoqën ta rrëzonin atë.
Një vendim fajësie mund të përmbysë garën presidenciale të vitit 2024, në të cilën Trump, kandidati republikan, po kërkon të rimarrë Shtëpinë e Bardhë nga presidenti demokrat Joe Biden në zgjedhjet e 5 nëntorit.
Udhëzimet e Merchan nënvizuan rolin kryesor të luajtur nga Cohen, i cili ishte avokati i Trump-it për afërsisht një dekadë përpara se të kishin një grindje.
Cohen dëshmoi se ai pagoi 130,000 dollarë nga xhepi i tij për të parandaluar Daniels që t’u tregonte votuesve për takimin e supozuar seksual me Trump që ajo thotë se kishte ndodhur 10 vjet përpara zgjedhjeve të 2016.
Cohen dëshmoi se Trump miratoi shpërblimin dhe ra dakord pas zgjedhjeve me një plan për të rimbursuar Cohen përmes kësteve mujore të maskuara si tarifa ligjore.
Avokatët e Trump kanë argumentuar se juristët nuk mund të mbështeten te Cohen, një kriminel i dënuar me një histori të gjatë të mashtrimit.
“Ai është gënjeshtari më i madh i të gjitha kohërave”, tha avokati i Trump, Todd Blanche, para juristëve të martën.
Sondazhet e opinionit tregojnë se Trump dhe Biden janë në një garë të ngushtë. Por sondazhi i Reuters/Ipsos ka gjetur se një vendim fajësie mund t’i kushtojë Trump mbështetjen mes votuesve të pavarur dhe disa republikanëve.
Një vendim i pafajësisë do hiqte një pengesë të madhe ligjore, duke e çliruar Trump-in nga detyrimi për t’u paraqitur në gjykatë. Nëse shpallet fajtor, ai pritet të apelojë vendimin. Trump përballet me tre hetime të tjera penale, por ato nuk pritet të dalë në gjyq përpara zgjedhjeve të 5 nëntorit.
