Anëtarët e Kuvendit të Komunës së Prizrenit të martën njëzëri kanë votuar për miratimin e vendimit për ndryshimin dhe plotësimin e Rregullores për përdorimin e gjuhëve në Komunën e Prizrenit, për të përfshirë në dispozitat e këtij akti edhe gjuhën rome si gjuhë në përdorim zyrtar.
Propozimi për ndryshimin dhe plotësimin e Rregullores është prezantuar para anëtarëve të Kuvendit nga udhëheqësi i Njësisë për komunikim me publikun, Ymer Berisha.
“Projekt-rregullorja është ndryshuar në një nen, e kemi shtuar një fjali, ku gjuha rome është gjuhë zyrtare në përdorim”, ka thënë Berisha, raporton Telegrafi.
Ai ka përkujtuar se vendimi për gjuhën rome si gjuhë në përdorim zyrtar është aprovuar më herët në këtë organ dhe se me ndryshimin e plotësimin e rregullores përmbyllet vendimmarrja administrative lidhur me këtë çështje.
