Ushtria izraelite shpëtoi katër pengje të mbajtur në Gazën qendrore të shtunën në një operacion të madh ditën e djeshme.
Sipas autoriteteve palestineze, në sulm janë vrarë 236 palestinezë ndërsa më shumë se 400 u plagosën
Çfarë dihet deri tani për sulmin
Noa Argamani, Almog Meir Jan, Andrey Kozlov dhe Shlomi Ziv u liruan nga robëria nga ushtria izraelite, inteligjenca dhe forcat speciale në dy vende të veçanta në kampin e refugjatëve Nuseirat, thanë të shtunën Forcat Mbrojtëse të Izraelit. Që të katër u rrëmbyen nga festivali muzikor Nova më 7 tetor. Ky është i treti operacion i tillë i suksesshëm që nga fillimi i luftës.
Mbi 200 palestinezë të vdekur
Të paktën 236 njerëz u vranë dhe më shumë se 400 u plagosën si rezultat i operacionit izraelit, tha zyra e mediave e qeverisë së enklavës. CNN nuk është në gjendje të verifikojë në mënyrë të pavarur numrat e zyrës së medias dhe nuk ka asnjë qartësi për ndarjen e viktimave mes civilëve dhe militantëve.
Më herët të shtunën, një producent i CNN në Spitalin Al-Aksa në Deir al-Balah tha se dhjetëra njerëz të plagosur po mbërrinin në qendrën mjekësore. Një zëdhënës i spitalit kishte thënë se numri i të plagosurve ishte aq i lartë sa ishte e vështirë të konfirmohej numri i saktë.
Palestinezët në terren në Gaza thanë se skena në Nuseirat ishte “ferri në tokë”, me “fëmijë të copëtuar dhe të shpërndarë në rrugë”.
Hamasi akuzoi Izraelin për kryerjen e një “masakre të tmerrshme”, duke thënë se operacioni i shpëtimit nuk do ndryshonte “dështimin strategjik të Izraelit në Rripin e Gazës”. Një zëdhënës i krahut të armatosur të Hamasit pohoi gjithashtu, pa ofruar prova, se Izraeli vrau pengje të tjerë në operacion.
Si ndodhi operacioni
Forcat izraelite u përgatitën për javë të tëra për sulmin special ushtarak të së shtunës. Zëdhënësi i IDF-së, Admiral Daniel Hagari tha se pengjet ishin mbyllur në dhomat e apartamenteve në ndërtesat civile shumëkatëshe. IDF zgjodhi një operacion gjatë ditës për të shfrytëzuar elementin e befasisë ndërsa bastisje të ngjashme ishin anuluar në minutën e fundit disa herë, tha ai. Hagari vlerësoi se numri i viktimave nga operacioni ishte “nën 100”. Bastisja rezultoi gjithashtu në vdekjen e një oficeri policie izraelite, i cili shërbente në një njësi speciale kundër terrorizmit, sipas policisë izraelite.
Familjet u ribashkuan, por ende bëjnë thirrje për veprim
Kryeministri izraelit Benjamin Netanyahu u takua me pengjet e shpëtuar dhe familjet e tyre në spitalin Sheba në qytetin Ramat Gan. Argamani u transferua në Spitalin Ichilov në Tel Aviv, në mënyrë që të mund të trajtohet atje së bashku me nënën e saj, e cila ka kancer në tru në fazën e fundit. Familjarët shprehën gëzimin që u ribashkuan me të dashurit e tyre, por gjithashtu i kërkuan qeverisë izraelite që të kthejë të gjithë pengjet që ende mbahen në Gaza.
Përgjigja e SHBA-së
Një qelizë amerikane në Izrael mbështeti përpjekjet e shpëtimit, duke punuar me forcat izraelite për operacionin, tha një zyrtar amerikan për CNN – duke iu referuar një ekipi që është në vend që mbështet Izraelin që nga 7 tetori me mbledhjen e informacionit për pengjet. Presidenti i SHBA Joe Biden tha të shtunën se ai e mirëpriti lajmin për shpëtimin dhe Shtëpia e Bardhë tha se “po mbështet të gjitha përpjekjet” për të liruar pengjet e mbetura.
VINI RE: Ky material është pronësi intelektuale e CNN
