Presidentja e Komisionit Evropian Ursula von der Leyen ka premtuar të “formojë një bastion kundër ekstremeve nga e majta dhe nga e djathta” në BE, pasi fraksioni i saj qendror ruajti vendin e parë në Parlamentin Evropian, pavarësisht se partitë e krahut të djathtë kanë arritur fitore ndaj koalicioneve qeverisëse si në Francë, ashtu edhe në Gjermani.
Partia Popullore Evropiane (EPP) e Von der Leyen ka fituar rreth 26% të vendeve në organin legjislativ të BE-së, sipas rezultateve të përkohshme të së dielës. Ajo vuri në dukje se partitë e qendrës po qëndrojnë të forta në Evropë, por pranoi se “ekstremet në të majtë dhe në të djathtë kanë fituar mbështetje”.
“Ne do t’i ndalojmë ata,” u tha Von der Leyen mbështetësve të saj në Bruksel të dielën mbrëma, duke u zotuar të “ndërtojë një bastion kundër ekstremeve nga e majta dhe nga e djathta”.
Von der Leyen, e cila kërkon një mandat të dytë si Presidente e Komisionit Evropian, deklaroi se qëllimi i saj është “të ndërtojë një shumicë të gjerë për një Evropë të fortë” dhe se ajo synon “të vazhdojë në këtë rrugë me ata që janë pro-evropianë, pro -Ukrainë, pro sundimit të ligjit.
Rritja e mbështetjes për partitë e krahut të djathtë u nxit nga shqetësimet reale të votuesve që mbetën të padëgjuara, sipas Zëvendës Presidentes së Konservatorëve dhe Reformistëve Evropianë (ECR), Assita Kanko.
“Kur anashkalohen aspiratat e vërteta të qytetarëve, fatkeqësisht i jep më shumë hapësirë lëvizjeve ekstreme. Kjo është arsyeja pse ne duhet të dëgjojmë qytetarët”, tha Kanko të dielën në Bruksel. ECR, e cila pritet të fitojë rreth 71 vende nga 720, ka mbrojtur për një fokus në sigurinë, kontrollin e emigracionit dhe vlerat evropiane.
