Presidenti rus Vladimir Putin nuk e kupton se pushtimi i Ukrainës është një gabim, tha kancelari gjerman Olaf Scholz, pasi liderët folën në telefon të martën.
Duke folur me gazetarët të mërkurën, Scholz tha se ai i kërkoi Putinit të tërheqë trupat dhe të rihyjë në bisedimet me Ukrainën gjatë telefonatës 90-minutëshe.
Ai bëri thirrje që Rusia të respektojë sovranitetin e Ukrainës.
Kancelarja është vënë nën presion për të rritur mbështetjen ushtarake për Kievin.
Scholz tha se tërheqja e trupave ruse nga Ukraina do të ishte mënyra e vetme që “paqja të ketë një shans në rajon”.
Megjithëse ai tha se Putin “për fat të keq” nuk e kishte ndryshuar qëndrimin e tij për pushtimin, Scholz theksoi rëndësinë e vazhdimit të bisedës me të.
“Është e drejtë të flasim me njëri-tjetrin dhe të themi atë që mund të thuhet për këtë temë”, tha Scholz.
Ai gjithashtu pretendoi se armët që Gjermania i kishte furnizuar Ukrainës kishin qenë “vendimtare” dhe “bënin ndryshimin” në Ukrainën lindore.
Ministri i Jashtëm ukrainas, Dmytro Kuleba, ka kritikuar Gjermaninë për mos dërgimin e më shumë armëve. Ai shkroi në Twitter të martën se Ukraina kishte nevojë për më shumë mbështetje ushtarake “për të çliruar njerëzit dhe për t’i shpëtuar ata nga gjenocidi”.
“Asnjë argument i vetëm racional se pse këto armë nuk mund të furnizohen, vetëm frika abstrakte dhe justifikime. Nga se ka frikë Berlini që Kievi nuk ka?”, shtoi ai./BBC
