Kate, Princesha e Uellsit, përshëndeti me dorë turmat dhe buzëqeshi gjerësisht nga ballkoni i Pallatit Buckingham pasi përshëndeti një paradë ushtarake të shtunën, duke bërë daljen e saj të parë publike këtë vit teksa po trajtohet për kancerin.
Princesha, 42 vjeçe, kaloi dy javë në spital në janar pasi iu nënshtrua një operacioni të rëdësishëm abdominal. Dy muaj më vonë ajo njoftoi në një videomesazh se testet kishin zbuluar praninë e kancerit dhe ajo po merrte kimioterapi parandaluese.
Ajo është ende në trajtim, por shëndeti i saj i përmirësuar bëri që ajo të mund të shfaqej në publik për herë të parë që nga dhjetori.
Princesha hipi në një karrocë të mbuluar me tre fëmijët e saj për të parë “Trooping the Colour”, një paradë ushtarake vjetore për të shënuar ditëlindjen zyrtare të monarkut britanik, mbretit Charles.
Megjithë shirat e dendur, turmat u rreshtuan në rrugë dhe tundnin dhe brohoritnin ndërsa karroca kalonte. Në një mesazh të rrallë personal me shkrim të premten, ajo tha se po bënte përparim të mirë, por “nuk ishte shëruar ende plotësisht”.
Zyra e Kate ka refuzuar të japë ndonjë hollësi në lidhje me llojin e kancerit ose për trajtimin e saj, përveçse të thotë se kimioterapia parandaluese kishte filluar në shkurt.
