Kryemjeku amerikan, Gjenerali Vivek Murthy, bëri thirrje të hënën që një etiketë paralajmëruese të shtohet në aplikacionet e mediave sociale si një kujtesë se ato platforma kanë shkaktuar dëme tek të rinjtë, veçanërisht tek adoleshentët.
Në një shkrim në New York Times, Murthy shkroi se vetëm një etiketë paralajmëruese nuk do t’i bëjë mediat sociale të sigurta për të rinjtë, por se mund të rrisë ndërgjegjësimin dhe të ndryshojë sjelljen, siç tregohet në provat nga studimet e duhanit. Kongresi i SHBA-së do duhet të miratojë legjislacionin që kërkon një etiketë të tillë paralajmëruese.
Mbrojtësit e të rinjve dhe ligjvënësit kanë akuzuar prej kohësh platformat e mediave sociale si Facebook, Instagram, TikTok dhe Snapchat për atë që ata thonë se është një efekt i dëmshëm te fëmijët, duke përfshirë shkurtimin e vëmendjes, nxitjen e imazheve negative të trupit dhe duke i bërë ata të prekshëm ndaj ngacmuesve dhe grabitqarëve në internet.
“Është koha për të kërkuar etiketën paralajmëruese në platformat e mediave sociale, duke deklaruar se mediat sociale shoqërohen me dëmtime të konsiderueshme të shëndetit mendor për adoleshentët”, shkroi Murthy të hënën.
TikTok, Snap dhe Meta Platforms, pronari i Facebook dhe Instagram, nuk iu përgjigjën kërkesave për koment.
Drejtorët ekzekutivë të këtyre tre kompanive, së bashku me platformën e mediave sociale X dhe aplikacionin e mesazheve Discord, u vunë nën lupë nga senatorët amerikanë në janar gjatë një seance dëgjimore për sigurinë e fëmijëve në internet, me senatorin republikan Lindsey Graham që akuzoi krerët e kompanive se kishin “gjak në duart e tyre” për dështimin në mbrojtjen e përdoruesve të rinj nga grabitqarët seksualë.
Disa shtete të SHBA-së kanë punuar për të miratuar legjislacionin për të mbrojtur fëmijët nga efektet e dëmshme të mediave sociale, të tilla si ankthi, depresioni dhe sëmundje të tjera mendore si rezultat.
Ligjvënësit e shtetit të Nju Jorkut këtë muaj miratuan legjislacionin për të ndaluar platformat e mediave sociale të ekspozojnë përmbajtje algoritmike “varësuese” për përdoruesit nën moshën 18 vjeç pa pëlqimin e prindërve.
Në mars, Guvernatori i Floridës, Ron DeSantis nënshkroi një projektligj që ndalon fëmijët nën 14 vjeç nga platformat e mediave sociale dhe kërkon që 14 dhe 15-vjeçarët të marrin pëlqimin e prindërve.
