Zvicra po mendon të prezantojë një program eksperimental për shpërndarjen e kokainës me recetë midis përdoruesve të drogës, që mund t’i ndihmojë ata të mposhtin varësinë e tyre nga ‘crack’.
Ndërsa masa është mbrojtur nga organizata dhe ekspertë prej disa kohësh, Komisioni Federal i Zvicrës për Varësinë dhe Parandalimin e Sëmundjeve Jo Transmetuese (EKSN) po e konsideron gjithashtu atë.
“Njerëzit që konsumojnë kokainë disa herë në ditë kapen në një rreth vicioz blerjeje dhe konsumi,” tha nënpresidenti i EKSN Christian Schneider për median publike SRF të martën.
“Ne të paktën po sugjerojmë se si mund t’u jepet kokaina përdoruesve të varur rëndë, në mënyrë që ata të mund të thyejnë rrethin vicioz dhe të shërohen.”
Komisioni po shqyrton ngritjen e ekipeve speciale për të vizituar personat e varur nga kokainë ‘crack’ dhe për t’u ofruar atyre ndihmë mjekësore dhe psikoterapeutike.
Shpërndarja e kontrolluar e kokainës është gjithashtu një mundësi, sugjeroi zyrtari, duke përmendur përpjekjet e shtetit për të mposhtur një epidemi të mëparshme të heroinës që përfshinte shpërndarjen e drogës, ose metadonit zëvendësues, te të varurit. Megjithatë, nuk ka plane për të filluar “shpërndarjen e kokainës në sasi të mëdha”, paralajmëron Schneider.
Megjithatë, disa ekspertë mjekësorë janë shumë kritikë ndaj idesë, duke argumentuar se nuk ekziston asnjë kërkim shkencor i mirëargumentuar që do justifikonte një program të tillë. Për më tepër, është e paqartë nëse autoritetet do jenë në gjendje të përcaktojnë kërkesën për ‘crack’ midis të varurve, tha për median specialisti i varësisë Marc Vogel nga Klinikat Psikiatrike Universitare në Bazel.
“Pyetja kryesore është nëse mund të arrijmë ngopje në mënyrë që njerëzit të jenë të kënaqur. Nëse kjo do funksionojë me shpërndarjen e kokainës është të paktën shumë e diskutueshme,” tha ai.
Zvicra filloi të përjetonte telashe me rritjen e abuzimit me kokainën ‘crack’ rreth vitit 2020, me mallra të raportuara me cilësi të dobët dhe ndoshta të lira që vërshonin rrugët. Gjeneva u godit së pari nga vala e ‘crack’, me problemin që u përhap më pas në disa qytete të tjera të mëdha, duke përfshirë Bazelin, Cyrihun dhe Lozanën.
Tregtarët e vegjël rrugorë me origjinë afrikane që mbërrijnë në vend nga Franca në numër të madh, thuhet se kanë luajtur rol të madh në epideminë e vijueshme. Lulëzimi i tregut të drogës ka tërhequr gjithashtu të varur nga vende të tjera, me vetëm një të tretën e përdoruesve të ‘crack’ në Gjenevë që besohet se janë vendas.
*Kokaina ‘crack’ është një formë e drogës që jep një efekt shumë të shpejtë, intensiv. Crack bëhet duke gatuar pluhur kokaine me sodë buke, duke e thyer më pas në copa të vogla të quajtura ‘gurë’. Emrin e ka marrë sepse kërcet kur nxehet dhe pihet.
