Organi më i lartë i mbrojtjes i Rumanisë, anëtar i NATO-s, tha të enjten se vendi do t’i dërgojë një sistem raketash Patriot Ukrainës për të ndihmuar Kievin në luftën me Rusinë, ndërsa forcat e Moskës vazhdojnë të bombardojnë zonat civile dhe infrastrukturën energjetike.
Zyra e Presidentit rumun Klaus Iohannis, i cili kryesoi mbledhjen e Këshillit të Lartë të Mbrojtjes Kombëtare në Bukuresht, tha se vendimi u mor në koordinim të ngushtë me aleatët dhe kushtëzohet nga Rumania që të marrë një sistem të ngjashëm ose të barasvlershëm. Sistemi i mbrojtjes ajrore i prodhuar në SHBA që do të dërgohet në Ukrainë është një nga disa që posedon Rumania.
“Vendimi u bazua në një vlerësim të thelluar teknik të autoriteteve rumune, duke u marrë të gjitha masat për të eliminuar rrezikun e krijimit të dobësive të mundshme për Rumaninë,” tha zyra e Iohannis. “Në të njëjtën kohë, ata do të vazhdojnë diskutimet me aleatët në mënyrë që mbrojtja ajrore e vendit tonë të forcohet më tej”.
SHBA i ka dhuruar Ukrainës një sistem Patriot dhe në fillim të këtij muaji miratoi dërgimin e një sistemi tjetër. Aleatët e tjerë, përfshirë Gjermaninë, gjithashtu kanë siguruar sisteme të mbrojtjes ajrore. Zyrtarët amerikanë kanë bërë presion në mënyrë rutinore që aleatët të ofrojnë sisteme të mbrojtjes ajrore në Kiev, por disa vende të Evropës Lindore kanë hezituar të heqin dorë nga sistemet e teknologjisë së lartë.
Presidenti ukrainas Volodymyr Zelenskyy u ka kërkuar vazhdimisht aleatëve perëndimorë që të forcojnë mbrojtjen ajrore të vendit të tij përballë sulmeve të vazhdueshme ruse në rrjetin elektrik të Ukrainës, të cilat javët e fundit i detyruan kompanitë energjetike të krijojnë ndërprerje në mbarë vendin.
“Pozicioni i Rumanisë është dhe do të vazhdojë të jetë i qartë në mbështetjen e saj shumëdimensionale të Ukrainës, së bashku me komunitetin ndërkombëtar, në të drejtën e saj legjitime për vetëmbrojtje kundër agresionit të paligjshëm dhe të paprovokuar të Rusisë”, tha zyra e Iohannis.
Pasi Rusia nisi një pushtim të plotë të Ukrainës më 24 shkurt 2022, NATO rriti praninë e saj në krahun lindor të Evropës duke dërguar grupe beteje shtesë shumëkombëshe tek anëtarët e aleancës Rumania, Hungaria, Bullgaria dhe Sllovakia.
Që atëherë, Rumania ka luajtur një rol gjithnjë e më të spikatur në aleancë gjatë gjithë luftës, duke përfshirë hapjen e një qendre trajnimi ndërkombëtar në juglindje të vendit për pilotët e avionëve F-16 nga vendet aleate dhe partnerë të tjerë, duke përfshirë Ukrainën.
VINI RE: Ky material është pronësi intelektuale e AP
