Të paktën 18 persona janë vrarë dhe 48 janë plagosur rëndë në tre shpërthime me bomba në një qytet lindor të Nigerisë, kanë thënë autoritetet vendase.
Në një deklaratë të dielën, Agjencia e Menaxhimit të Emergjencave të shtetit të Bornos (SEMA) tha se shpërthimi i parë ndodhi në një turmë të mbledhur për një martesë në Gwoza, afër kufirit me Kamerunin. Policia tha se një grua “shpërtheu një mjet shpërthyes të improvizuar në një park të mbushur me njerëz”, duke shtuar se ajo u pa duke mbajtur një fëmijë në shpinë.
Disa minuta më vonë, një shpërthim i dytë shpërtheu në një spital në Gwoza dhe një shpërthim i tretë i shkaktuar gjithashtu nga një kamikaze, goditi një funeral, tha agjencia.
Ndër viktimat janë disa fëmijë, ndërsa 48 persona janë lënduar rëndë, tha SEMA, duke shtuar se të plagosurit po marrin të gjithë trajtimin e nevojshëm.
Një anëtar i një milicie lokale, siç citohet nga agjencia e lajmeve AFP, tha se dy nga kolegët e tij dhe një ushtar u vranë në një sulm të veçantë në një postbllok, një pretendim që nuk është konfirmuar nga autoritetet.
Presidenti nigerian Bola Tinubu ka dënuar sulmet, duke theksuar se ai dhe qeveria e tij “po marrin masat e nevojshme për të garantuar sigurinë e qytetarëve” dhe duke u zotuar se autorët do të përballen me drejtësinë. Deri më tani asnjë grup nuk ka marrë përgjegjësinë.
