Prodhuesi amerikan i makinave Ford ka bërë shkurtime të konsiderueshme të menaxhimit në fabrikën e tij gjermane në Këln, sipas një plani ristrukturimi që mund të bëjë që gjiganti i automjeteve të largohet nga vendi, raportoi Bild të enjten.
Sipas gazetës, shqetësimet në njësinë e saj gjermane po shtohen pasi Ford njoftoi se vetëm katër nga dhjetë drejtorët e tanishëm do ruajnë postet e tyre.
“Si pjesë e shndërrimit të biznesit evropian, Ford po thjeshton strukturën e tij administrative dhe menaxhuese në Gjermani dhe po zvogëlon menaxhimin e Ford-Werke GmbH”, citohet të ketë thënë prodhuesi i makinave në një deklaratë.
Me efekt nga 1 korriku 2024, maksimumi katër anëtarë do formojnë menaxhmentin.
Kryetari i Bordit Mbikëqyrës Kieran Cahill argumentoi se hapi drastik është i nevojshëm për të thjeshtuar strukturën administrative dhe menaxhuese të Fordit në Gjermani. Lëvizja “na jep më shumë shpejtësi veprimi dhe lejon ekipin e menaxhimit të përqendrohet plotësisht në detyrat e tij operacionale dhe ta çojë Fordin drejt një të ardhmeje të suksesshme,” e citoi Bild të thoshte.
Ford njoftoi shkurtime masive vitin e kaluar si pjesë e një plani shtrëngues, duke thënë se do të shkurtojë 3,800 vende pune në Evropë, kryesisht në Gjermani, pasi kalon në prodhimin e automjeteve elektrike (EV), që kërkon më pak personel.
