Donald Trump ruan epërsinë ndaj Joe Biden në shumicën e shteteve të rëndësishme me më pak se katër muaj para zgjedhjeve presidenciale të 5 nëntorit.
Kjo tregon fuqi të jashtëzakonshme të rikthimit për Trump-in, i cili u largua nga Shtëpia e Bardhë në 2021 me një vlerësim të ulët rekord prej 29 përqind pasi disa nga mbështetësit e tij sulmuan Kapitolin e SHBA-së më 6 janar. Muajin e kaluar, ai u bë ish-presidenti i parë i dënuar për një krim.
Megjithatë, 48 për qind e votuesve amerikanë do zgjidhnin Trumpin për president, sipas një sondazhi të fundit të NYT/Siena, kundrejt 42 për qind mbështetje për Biden. Vetëm 35 për qind e votuesve e miratojnë Biden-in kurse 61 për qind jo.
Me më pak se katër muaj për tëshkuar në kutitë e votimit ja ku qëndron gara.
Çfarë thonë sondazhet tani?
Trump dhe Biden janë të dy në sondazhe pak mbi 40 për qind, me Trump që tani për tani mban një përparësi të vogël prej 0.2 pikë përqindjeje, shumë brenda kufijve të gabimit statistikor, sipas mesatareve të FiveThirtyEight.
Kandidati i pavarur Robert F Kennedy Jr – i cili është përjashtuar nga debati i parë presidencial i fushatës – ka qenë në anketë me rreth 10 për qind.
Sondazhet kombëtare tregojnë një garë të ngushtë
Por zgjedhjet presidenciale në SHBA nuk vendosen nga një votim kombëtar. Përkundrazi, ato zgjidhen sipas parimit “fituesi i merr të gjitha” në pothuajse të gjitha 50 shtetet, të cilat dërgojnë zgjedhësit në Kolegjin Zgjedhor. Cilido kandidat që siguron 270 nga 538 votat e Kolegjit Zgjedhor bëhet president.
Në katër “shtetet e lëkundura” vendimtare – Arizona, Xhorxhia, Nevada dhe Karolina e Veriut – Trump mban epërsi njëshifrore. Tre të tjerë – Miçigani, Pensilvania dhe Uiskonsin – janë në thelb në ekuilibër.
Trump ka përparësi në shumicën e sondazheve të fushëbetejës
Cilat janë çështjet që do vendosin zgjedhjet dhe kush i udhëheq ato?
Ekonomia është prioriteti kryesor për votuesit amerikanë dhe Trump po fiton për këtë çështje.
Në përgjithësi, 41 për qind e votuesve i besojnë Trump-it ekonominë, krahasuar me vetëm 37 për qind për Biden, sipas sondazhit të fundit të Financial Times të kryer me Shkollën e Biznesit të Universitetit të Miçiganit Ross.
Një sondazh i CNN në prill zbuloi se 65 për qind e votuesve të regjistruar e quajtën ekonominë “jashtëzakonisht” të rëndësishme për votën e tyre – më e lartë se çdo çështje tjetër – dhe afër niveleve të papara që nga tetori 2008.
Inflacioni i zgjatur e ka dëmtuar Biden-in dhe ata që janë më pesimistë për ekonominë janë votuesit që kanë më shumë gjasa të duan ndryshim në Shtëpinë e Bardhë.
Nga ata që thanë se ekonomia ishte “e dobët”, 41 për qind thanë se një ndryshim në udhëheqjen politike në Uashington do rriste perceptimin e tyre për ekonominë, ndërsa 37 për qind thanë se do përmirësohej me inflacion më të ulët dhe 14 për qind thanë se do kishin financat personale më të mira.
Çështje të tjera kryesore përfshijnë emigracionin – ku sondazhet sugjerojnë se votuesit besojnë se Trump është më kompetent se Biden – ruajtja e të drejtave të abortit dhe uljen e kostove të kujdesit shëndetësor. Presidenti është më i fortë në dy fundit. Fushata e tij ka vënë gjithashtu mbrojtjen e demokracisë në qendër të fushës.
Por një sondazh i fundit i Washington Post zbuloi se më shumë votues në gjashtë shtete të luhatshme i besuan Trump-it dhe jo Biden-it për të trajtuar kërcënimet ndaj demokracisë amerikane.
Votuesit e shohin Biden-in si më të mirë për çështjet e abortit, por preferojnë Trump për inflacionin dhe emigracionin
Shumica e amerikanëve nuk votojnë bazuar në politikën e jashtme. Por votuesit kanë thënë vijimësisht se mendojnë se SHBA po shpenzon shumë për ndihmën ushtarake dhe financiare për Ukrainën dhe Izraelin, sipas sondazhit mujor të FT-Michigan Ross. Kjo mund të ndihmojë Trump.
Megjithëse Trump nuk ka thënë se do shkurtojë fondet për asnjërin vend, ish-presidenti e ka bërë të qartë se ai priste që vendet e tjera në Evropë të rrisin shpenzimet e tyre të mbrojtjes kur vjen puna për të përballur Rusinë. Republikanët kanë bllokuar gjithashtu përpjekjet e Kongresit për të miratuar ndihmën për dy vendet, duke u zbutur qëndrimin në mes të prillit pas muajsh bllokimi.
Shumë amerikanë mendojnë se SHBA po shpenzon shumë për ndihmën ushtarake për Ukrainën dhe Izraelin
Mënyra se si votuesit i shohin Biden dhe Trump si njerëz mund të jetë faktori më i rëndësishëm.
Shumica e votuesve thonë se Trump, 78 vjeç, është më i aftë fizikisht dhe mendërisht se Biden, 81 vjeç, por janë më pak të sigurt se Trump do veprojë me etikë në detyrë.
Sipas një sondazhi të prillit nga Pew Research, 62 për qind e votuesve të regjistruar thanë se nuk ishin të sigurt se Biden ishte mendërisht i aftë për detyrën, krahasuar me 59 për qind që thanë se nuk ishin të sigurt se Trump do sillej në mënyrë etike.
Muajin e kaluar Trump u bë ish-presidenti i parë i Amerikës që u dënua për një krim dhe megjithatë, ndikimi ka qenë mezi i dukshëm në sondazhe.
Rreth 90 për qind e republikanëve ende e shohin atë në mënyrë të favorshme, sipas sondazhit të fundit të NYT/Siena, dhe 68 për qind e votuesve të regjistruar thanë se kjo nuk kishte asnjë ndryshim për ta.
Gjendja mendore e Biden përballë etikës së Trump
Trump ende përballet me padi të tjera penale dhe pavarësisht se shumica e amerikanëve të pavarur besojnë se Trump është fajtor për to, sipas një sondazhi të Politico Magazine/Ipsos, ka gjithnjë e më pak gjasa që ndonjë nga rastet të përfundojë përpara zgjedhjeve të 5 nëntorit.
Gjykata e Lartë gjithashtu pritet që së shpejti të vendosë nëse Trump do ishte i imunizuar nga ndjekja penale për veprimer e kryera gjatë kohës që ai ishte president.
Kush ka më shumë para dhe ku po shpenzohen?
Biden e kishte tejkaluar masivisht Trumpin në garën e parave, sipas dosjeve më të fundit tremujore, nga fillimi i vitit. Dhe arkat e Trump ishin zbrazur nga dhjetëra miliona tarifa ligjore.
Por Trump ka punuar shumë për të mbyllur deficitin, me një fushatë për mbledhjen e fondeve që përfshinte një dhuratë prej 50 milionë dollarësh nga një trashëgimtar bankar. Megadhuruesit e tjerë miliarderë janë zotuar të mbështesin gjithashtu fushatën e tij.
Pjesa më e madhe e këtyre parave do shpenzohen për reklama. Fushata e Biden dhe komitetet e veprimit politik të lidhur me të kanë blerë tashmë gati 240 milionë dollarë në reklama për zgjedhjet e përgjithshme, sipas gjurmimit të të dhënave të AdImpact nga FT, krahasuar me 85 milionë dollarë për Trump.
Shpenzimet totale të reklamave në fushatën presidenciale të SHBA-së 2024
Këto para janë derdhur në Pensilvani, Xhorxhia, Miçigan dhe fusha të tjera beteje, të cilat janë në përmbytje të reklamave ndërsa zgjedhjet po afrohen. Të dy fushatat shpallën rivale reklamash pak përpara debatit të parë presidencial.
VINI RE: Ky material është pronësi intelektuale e FT
Përgatiti për Hashtag.al, Klodian Manjani
