Presidenti amerikan Joe Biden kritikoi të hënën vendimin e Gjykatës së Lartë për t’i dhënë imunitet të konsiderueshëm nga ndjekja penale ish-presidentit Donald Trump për akuzat për përmbysje zgjedhore në lidhje me sulmin e 6 janarit 2021 në Kapitolin e SHBA-së.
“Ky komb u themelua mbi parimin se nuk ka mbretër në Amerikë. Secili prej nesh është i barabartë përpara ligjit… Askush nuk është mbi ligjin, madje as presidenti i Shteteve të Bashkuara,” tha Biden.
“Vendimi i sotëm i Gjykatës së Lartë për imunitetin presidencial e ndryshoi rrënjësisht atë për të gjitha qëllimet praktike. Vendimi i sotëm pothuajse me siguri do të thotë se praktikisht nuk ka kufij për atë që mund të bëjë një president”.
Vërejtjet e tij erdhën pasi Gjykata e Lartë, në një vendim monumental, vendosi që ish-presidentët të gëzojnë një prezumim të imunitetit penal për aktet zyrtare gjatë qëndrimit në Shtëpinë e Bardhë, duke i dhënë fitoren Trump.
“Ky është një parim thelbësisht i ri dhe është një precedent i rrezikshëm, sepse pushteti i zyrës nuk do të kufizohet më nga ligji, madje duke përfshirë edhe Gjykatën e Lartë të Shteteve të Bashkuara. Kufizimet e vetme do vendosen vetëm nga presidenti,” shtoi ai.
