Autoritetet në Vilnius, kryeqyteti i Lituanisë, kanë zhvilluar një plan për të rrethuar të gjithë qytetin me pengesa antitank përpara fundit të vitit, njoftoi të martën kryebashkiaku Valdas Benkunskas.Ish-republika sovjetike në Detin Baltik kufizohet me Letoninë në veri dhe me Poloninë në jug, por gjithashtu ndan një kufi me Rajonin e Kaliningradit të Rusisë dhe Bjellorusinë.
“Vilnius, si kryeqyteti i vendit, është një nga objektivat kryesore ushtarake, ndaj është e nevojshme të bëhet gjithçka që është e mundur, përveç masave ushtarake, për ta mbrojtur atë”, u tha Benkunskas gazetarëve.
Qyteti ka bërë tashmë marrëveshje për të blerë dy lloje pengesash antitank, shtoi kryebashkiaku, duke përfshirë trekëndëshat e betonit të quajtur “dhëmbët e dragoit” dhe trarët prej çeliku “iriqët”.
“Ne do t’i kemi në dispozicion këto mjete të kundërlëvizshmërisë ushtarake tashmë në vjeshtë,” tha Benkunskas. Ai shpjegoi se ato do vendosen në pikat e afrimit për në Vilnius nga punëtorët komunalë, në rast emergjence. Ideja është që të ketë pengesa të mjaftueshme për të gjithë perimetrin e qytetit.
Vilnius po kërkon gjithashtu të rrisë numrin e sirenave të sulmit ajror, të zgjerojë rrjetin e strehimoreve për bomba dhe të hartojë plane për evakuimin e plotë të qytetit brenda 36 orëve, sipas Benkunskas.
Vilnius ndodhet në Lituaninë juglindore, rreth 185 km në lindje të Rajonit të Kaliningradit dhe 30 km nga kufiri me Bjellorusinë.
Muajin e kaluar, kryeqyteti polak i Varshavës zhvilloi një stërvitje për të provuar besueshmërinë e strehimoreve emergjente dhe infrastrukturës tjetër jetike. Kryebashkiaku Rafal Trzaskowski tha se stërvitjet ishin të nevojshme “për çdo rast”.
Në fillim të këtij viti, Estonia njoftoi se do ndërtonte bunkerë dhe “instalime mbrojtëse kundër lëvizjes” përgjatë kufirit të saj prej 294 kilometrash me Rusinë. Ndërtimi i “Linjës Baltike” pritet të nisë në vitin 2025.
