Komisioni Evropian ka konfirmuar atë që dukej të ishte një përfundim i paracaktuar: tarifa të larta do të vendosen për automjetet elektrike me bateri (BEV) të prodhuara në Kinë që nga 5 korriku, një vendim i rëndësishëm që synon të ripërcaktojë marrëdhëniet me Pekinin dhe të ftojë masa hakmarrëse kundër prodhuesve evropianë.
Hapi, i paraparë në fillim të qershorit, është rezultat i një hetimi nëntë-mujor që zbuloi se subvencionet po pompoheshin në të gjithë zinxhirin e furnizimit të BEV-ve të prodhuara në Kinë, si nga kompanitë vendase ashtu edhe nga ato të huaja. Paratë publike u zbuluan kudo, thanë zyrtarët, nga minierat e lëndëve të para të nevojshme për të prodhuar bateritë deri te shërbimet e transportit të përdorura për të sjellë produktet e gatshme në brigjet e Evropës.
Shkalla e madhe e subvencioneve u lejon prodhuesve kinezë të ofrojnë BEV-të e tyre me çmime dukshëm më të ulëta se ato të montuara në bllok, ku kostot e energjisë dhe të punës janë shumë më të larta. Hendeku i çmimeve ka shkaktuar një rritje të shpejtë të importeve të BEV-ve të prodhuara në Kinë: nga një pjesë e tregut prej 3.9% në 2020 në 25% në fund të 2023, sipas Komisionit.
Kjo valë e importeve me kosto të ulët përfaqëson një “kërcënim dëmtimi ekonomik” për industrinë e BE-së që mund të çojë në humbje shkatërruese dhe të rrezikojë më shumë se 12 milionë vende pune direkte dhe indirekte, paralajmëron ekzekutivi.
Prandaj, tarifat janë të nevojshme për të kompensuar avantazhin e padrejtë të dhënë nga subvencionet.
Vendimi i publikuar të enjten parasheh tarifa të diferencuara, të llogaritura sipas kompanisë mëmë, qarkullimit vjetor dhe sasisë së dyshuar të subvencioneve të marra. (BYD: 17.4%; Geely: 19.9%; SAIC: 37.6%
Prodhues të tjerë makinave elektrike në Kinë që bashkëpunuan në hetim, por nuk janë marrë në mostër individualisht, duke përfshirë Tesla dhe BMW: 20.8%
Prodhuesit e tjerë të BEV në Kinë që nuk bashkëpunuan: 37.6%
Vendosja e masave do të jetë, për momentin, provizore. Autoritetet doganore do të kërkojnë garanci bankare, në vend të parave të gatshme, nga eksportuesit kinezë, që do të thotë se klientët fundorë mund të mos vërejnë menjëherë një ndryshim në xhepin e tyre.
Shtetet anëtare do të mbajnë një votim të parë pas dy javësh, por ky do të jetë jo detyrues dhe do të shërbejë për të testuar ujërat politike. Tarifat do të mbeten në fuqi deri në marrjen e një vendimi përfundimtar brenda katër muajve, të cilin vendet mund ta bllokojnë nëse krijojnë një shumicë të cilësuar kundër propozimit. (15 shtete anëtare që përfaqësojnë 65% të popullsisë së bllokut.).
Gjermania, një eksportues i makinave të klasit botëror me lidhje të forta me tregun kinez, dhe Hungaria, një qendër në rritje për investimet kineze, janë ndër ato që mund të kundërshtojnë.
Shoqata Gjermane e Industrisë së Automobilave (VDA) thotë se “tarifat nuk janë një masë adekuate” për të forcuar konkurrencën” dhe potencialisht mund të nxisin një “situatë humbje-humbje.” Organizata është veçanërisht e shqetësuar për efektet në sipërmarrjet e përbashkëta, si ato Volkswagen dhe General Motors kanë me SAIC.
Nga ana tjetër, Franca dhe Italia mbështesin taksat shtesë, gjë që sugjeron se votimit të nëntorit do t’i paraprihet nga një luftë e gjithanshme politike.
