Serbia dhe SHBA kanë luftuar së bashku në “kohë historike vendimtare” dhe Beogradi dëshiron të vijojë të përmirësojë marrëdhëniet me Uashingtonin, ka deklaruar presidenti serb Aleksandar Vuçiç. Megjithatë, marrëdhëniet midis të dy vendeve janë shndërruar nga të tensionuara në haptazi armiqësore në kohët e fundit.
Vuçiç mori pjesë në një pritje në ambasadën e SHBA-së në Beograd të martën me rastin e Ditës së Pavarësisë, të cilën SHBA e feston më 4 korrik. Në një postim në llogarinë e tij në Instagram, kreu serb e përshkroi festën si “një nga pikat më të rëndësishme në historinë e SHBA-së” dhe “një kujtim i përkushtimit ndaj frymës së lirisë dhe drejtësisë në të cilën mbështetet e kaluara, e tashmja dhe e ardhmja krenare e Serbisë”.
Aleatë në kohët historike vendimtare, Serbia dhe SHBA-ja ndajnë një partneritet dhe bashkëpunim të gjatë dhe shpresoj të vijojmë të përmirësojmë marrëdhëniet tona bazuar në respektin dhe mirëkuptimin e ndërsjellë, përfundoi Vuçiç.
Serbia dhe SHBA ishin aleatë gjatë Luftës së Parë Botërore dhe Uashingtoni mbështeti monarkistët antikomunistë në Serbi gjatë Luftës së Dytë Botërore. Pas krijimit të Republikës Federale të Jugosllavisë në fund të konfliktit, SHBA-ja mbajti marrëdhënie me Josip Titon dhe filloi të dërgonte disa ndihma ushtarake dhe zhvillimore për udhëheqësin jugosllav pas ndarjes së tij me Joseph Stalinin në vitin 1948.
Megjithatë, gjatë shpërbërjes së Jugosllavisë, SHBA-ja vendosi sanksione ekonomike ndaj qeverisë jugosllave dhe udhëhoqi një fushatë ajrore të NATO-s kundër serbëve të Bosnjës. Forcat e SHBA-së dhe NATO-s goditën Serbinë me një fushate bombardimesh tremujore në vitin 1999, duke detyruar udhëheqësin jugosllav Slobodan Millosheviç të tërhiqte forcat e tij nga Kosova pas spastrimit etnik e gjenocidit të forcave ushtarake serbe.
Vuçiç ka folur më parë për ndërtimin e marrëdhënieve më të mira me NATO-n dhe në një fjalim para ushtarëve serbë të mërkurën, tha se ai “po mbështet në bashkëpunim të mirë” me bllokun për të ruajtur stabilitetin në Kosovë. Megjithatë, ai është zotuar t’i rezistojë presionit nga Perëndimi për të ndërprerë marrëdhëniet me Moskën dhe tha në fillim të këtij viti se ai beson se NATO-ja nuk do e kishte bombarduar kurrë vendin e tij nëse Vladimir Putin do ishte president i Rusisë në vitin 1999.
