Dekanati i Fakultetit të Ekonomisë në Universitetin e Tiranës ka dalë me një deklaratë ditën e sotme për ngjarjen e ndodhur më datë 5 korrik në ambientet e fakultetit ku përgjegjësi i departamentit të Marketing-Turizmit u arrestua me dyshimet se ushtroi dhunë ndaj pedagoges Liljana Billa (Elmazi).
Në deklaratën e lëshuar për publikun dekanati dënon dhunën.
Më tej dekanati fton maturantët të zgjedhin fakultetin e Ekonomisë në Universitetin e Tiranës duke i “garantuar staf akademik të përkushtuar”.
“Dekanati i Fakultetit të Ekonomisë të Universitetit të Tiranës në mbledhjen e datës 08. 07. 2024, ora 09:30, dënoi dhunën e ushtruar në incidentin e ndodhur brenda ambjenteve të Fakultetit në datën 05. 07. 2024.
Dekanati i Fakultetit mbështet deklaratën zyrtare të strukturave drejtuese të Universitetit të Tiranës për ngjarjen e ndodhur mes dy kolegëve të FE-UT, (bashkëngjitur deklarata).
Dekanati i Fakultetit të Ekonomisë UT sqaron opinionin publik se ky incident është i shkëputur dhe nuk cënon integritetin e institucionit tonë. FE-UT është Fakulteti me standartin më të lartë dhe më cilësor falë stafit akademik mjaft të kualifikuar dhe studentëve të vet.
Garantojmë çdo maturant që do të aplikojë dhe çdo student se në Fakultetin e Ekonomisë, UT do të gjejë si gjithmonë një staf akademik të përkushtuar, që i zhvillon të gjitha proceset me standarte të larta dhe me integritet të plotë profesional dhe etik. Është puna e përkushtuar e pedagogëve tanë që u garanton çdo vit studentëve më të mirë të vendit, që zgjedhin Fakultetin e Ekonomisë, një shkollim dinjitoz, që i pajis ata me dije dhe edukim të shëndetshëm që i shoqëron kudo gjatë gjithë jetës“-thuhet në deklaratë.
Gazetari Arsen Rusa ka zbardhur pjesë nga dosja hetimore e sherrit mes pedagogëve në të cilën tregohet dinamika e ngjarjeve.
Në kërkesën e prokurorit Dritan Nushi drejtuar Gjykatës së Tiranës për Mirdaim Axhamin, shefin e Departamentit në Fakultetin e Ekonomikut, Universiteti i Tiranës thuhet se “Duhet të vendoset domosdoshmërisht një masë shtrënguese dhe ndaluese, pasi ka rrezik se prania e tij në atë vend pune, vë në rrezik marrjen dhe vërtetësinë e provave, prishjen e tyre për shkak të rrethanave dhe personalitetit që ka dhe mund të kryejë të njëjtin krim, ose më rëndë së ky”.
Nga mbledhja e provave dhe hetimi i kryer nga prokuroria, bazuar dhe në dëshmitë e dhëna nga pedagogia Liljana Billa, Mirdaim Axhami, senatori i studentëve Elion Mulgeci dhe dekani i fakultetit Dhori Kule, organi i akuzës ka ngritur akuzën për kryerjen e veprës penale “Goditja për shkak të detyrës”, kryer në mjediset e institucionit ku personi ushtron detyrën, funksionin…, bazuar në nenin 237/5 i Kodit Penal dhe “Vetgjyqsisë” sipas nenit 227.Pedagoge prej 35 vitesh, Liliana Billa me datë 5 korrik kishte provim në lëndën “Kërkimi i Aplikuar Master Shkencor”.
Të shtunën e kaluar, referuar dosjes, Billës i ka ardhur një email nga Axhami, ku ky i fundit i kërkon t’i dërgojë materialet pasi ai do caktonte një komision për të bërë tezën e provimit, duke qenë se pedagogia kishte marrë leje për shkak se e ëma ishte sëmurë.
Sipas deklarimeve të Billës, ajo i ka thënë se do shkojë vetë ne fakultet për të firmosur tezën e provimeve dhe ditën që ka shkuar është ngjitur në zyrën e Mirdaim Axhamit dhe i ka kërkuar që dhe ai të hedhë firmën e vet. Shefi i Departamentit ka refuzuar të firmosë me argumentin se teza duhet të studiohet, një procedurë kjo që shkel rregulloren, siç shprehet Billa.
Këtë shqetësim Billa ia adresoi dekanit, i cili e këshilloi atë të përgatisë një tezë të re, procedurë që Liljana Billa e kreu dhe madje studentët iu nënshtruan provimit. Hetimi i prokurorisë tregon se në momentin që po zhvillohej provimi, Axhami konstatoi një gjë të tillë dhe i kërkoi llogari Billës që përse po bëhet teza pa firmën e tij. Ky i fundit madje e ka kërcënuar duke i thënë “Siç e hodhe në plehra tezën, ashtu do të hedh dhe unë ty në plehra” dhe e dhunoi fizikisht duke e goditur disa herë me grusht ne fytyrë, konkretisht në sy, ku dallohej shenja e dhunës.
Pedagoge Liliana Billa ka rënë në dysheme pas goditjes dhe në tentativë për të ngritur telefonin, ka marrë një tjetër goditje nga Axhami, i cili i theu thonjtë duke i tërhequr celularin me forcë nga duart dhe pas këtij momenti është larguar me vrap nga korridori i fakultetit.
Në deklarimet e dhëna, Billa shprehet se ra pa ndjenja për shkak te goditjes së fortë dhe ajo e akuzon Axhamin se e ka goditur për arsye të përfitimit monetar, marrë shkas dhe nga këmbëngulja e tij që të studionte tezën paraprakisht.
“Sipas saj, arsyeja që Axhami ka refuzuar të firmosë provimin dhe pse situata ka agravuar nga ana e tij, derisa e ka goditur me grushte, meqenëse ai këmbëngul ta bëj ai tezën ose dikush që ai ka interes, kjo sipas saj është në shkelje të ligjit të Arsimit të Lartë që thotë që tezën e provimit e bën pedagogu i provimit që jep leksionet. Shkurt, Axhami donte të shkelte ligjin, por ajo nuk pranoi të bëhej pjesë, por zbatoi detyrën konform rregullores, prandaj ai e ka goditur sepse e di që ajo nuk i ka futur kurrë duart në xhepat e studentit dhe shtetit”, thotë prokuroria.
Prokuroria nuk ka mundur ende të disponoi raportin mjeko-ligjor të Liljana Billës, por nisur nga kayrja e jashtme, e dokumentuar me proces verbal dhe fotografi, në pjesën e djathtë të fytyrës vërehen disa gërvishtje me skuqje dhe syri i djathtë i dëmtuar si dhe gërvishtje me njolla gjaku.
Në deklarimin e tij, Axhami është shprehur se në momentin që ka parë Billën ulur në karrige në korridorin e fakultetit, e ka pyetur se përse po e bën tezën të pa miratuar nga përgjegjësi i departamentit dhe se kjo e fundit ka ngritur telefonin për ta filmuar.43 vjeçari shton se ai tentoi të pengojë filmimin, por Billa e ka sulmuar duke e gërvishtur në pjesë të ndryshme të trupit, duke i shkaktuar plagë në gisht dhe se ajo u rrëzua nga forca e tërheqjes dhe gravitetit.
Nga këqyrja e jashtme e trupit të Axhamit është konstatuar se në pjesën e parakrahut të djathtë, ka disa gërvishtje me skuqje si dhe në pjesën e majtë të shpatullës ka të njëjtat gërvishtje si dhe te gishti i madh i dorës së djathtë, një të çarë me njollë gjaku.
