Kryeministri indian Narendra Modi mbërriti në Moskë të hënën për një vizitë shtetërore dyditore që përfshin një takim me presidentin rus Vladimir Putin të planifikuar për të hënën mbrëma.
Debati mbi rëndësinë e synuar të vizitës së Modit ishte i përhapur në qarqet e politikës së jashtme të hënën. Zyrtarisht, qeveria indiane tha se Modi thjesht po rifillonte një traditë të gjatë të samiteve dypalëshe me Rusinë, që u ndërpre fillimisht nga pandemia Covid-19 dhe më pas pushtimi i Rusisë në Ukrainë.
India ka mbajtur marrëdhënie të përzemërta me Rusinë që nga Lufta e Ftohtë, duke u kthyer në një “partneritet strategjik” zyrtar me një marrëveshje të nënshkruar në vitin 2000.
Sipas Neë York Times, Modi kërkon të sinjalizojë “vendosmërinë e tij për t’iu përmbajtur rrugës së tij diplomatike” duke shkuar në Moskë në një kohë kur bota perëndimore është e etur të izolojë Putinin dhe t’i bëjë presion atij për paqe.
Nga ana e tij, Putin mund të përdorë vizitën e Modit për të treguar se “Kremlini vijon të ketë një partneritet të fortë me Indinë, pavarësisht thellimit të marrëdhënieve të Indisë me Shtetet e Bashkuara”. India blen sasi të mëdha të naftës ruse me çmime të ulura, një marrëveshje që u ka dhënë përfitime jashtëzakonisht të mëdha të dyja vendet që nga shpërthimi i luftës në Ukrainë.
Bloomberg Neës spekuloi se Modi dhe Putin duhej të ‘pastronin’ disa çështje të mprehta në marrëdhëniet e tyre dypalëshe. India është veçanërisht e shqetësuar për afrimin e Rusisë me Kinën, rivale rajonale, që ndoshta ka bërë më shumë për të ndihmuar Rusinë të kapërcejë sanksionet sesa blerjet gjigante të naftës nga ana e Indisë. Çekuilibri i madh tregtar i Indisë me Rusinë po i shkakton gjithashtu Modit disa probleme politike në vend.
Petr Topychkanov i Institutit Ndërkombëtar të Paqes në Stokholm tha se ndërsa Modi dhe Putin shprehin miqësinë e tyre të ngushtë në publik, Putini mund të “përballet me pyetje nga Modi në lidhje me lidhjet gjithnjë e më të ngushta mes Rusisë dhe Kinës”, ndërsa të dy udhëheqësit flasin “pas dyerve të mbyllura”.
Business Insider pyeti veten nëse Modi po përpiqej aktivisht të inatoste Shtetet e Bashkuara dhe Evropën duke u takuar me Putinin ndërkohë që afërsisht në të njëjtën kohë NATO po takohet në Uashington për të diskutuar krizën e Ukrainës.
“Angazhimi i Indisë me Rusinë nuk është një pamje e mirë për SHBA-në, pasi vjen ndërkohë që Uashingtoni po përpiqet të izolojë Putinin”, theksoi Business Insider, duke cituar zyrtarë amerikanë të cilët thanë se kjo pikë është ngritur me shumë delikatesë me qeverinë indiane.
Modi sapo kaloi nëpër një zgjedhje të ndërlikuar që e pa atë të fitojë një mandat të tretë historik, por me fuqi parlamentare shumë të pakësuar për Partinë e tij “Bharatiya Janata”. Ai ka arsye të forta politike të brendshme për të pohuar pavarësinë dhe mund të shpresojë të përdorë marrëdhëniet e Indisë me Rusinë si një mjet për të pasur oferta e marrëveshje më të mira nga SHBA-ja, teksa ajo kërkon të tërheqë Indinë më fort në orbitën e saj dhe përpiqet të zhvendosë Rusinë si partner kryesor i Indisë për sa i përket furnizimit ushtarak.
Një vizitë me “nota dashurie” me Putinin mund të jetë gjithashtu një mënyrë që Modi t’i bëjë të ditur botës perëndimore se ai nuk do pranojë shumë kritika për punët e brendshme të Indisë, duke përfshirë të dhënat e saj të të drejtave të njeriut.
Human Rights Watch (HRW) të hënën tha se ishte e pahijshme që Modi, si kreu i një demokracie të madhe, t’i jepte kriminelit autoritar të luftës Putin legjitimitetin e nevojshëm diplomatik:
“Pozicioni toksik global i Rusisë i ka bërë të rralla këto kohë vizitat e krerëve të fuqive të mëdha demokratike si India. Kur Modi viziton Moskën, shumë ukrainas mund të ndihen të mërzitur pasi ai nuk arrin të pranojë publikisht mizoritë dhe vuajtjet e tyre. Shumë rusë të tmerruar nga lufta abuzive e Kremlinit mund të ndihen gjithashtu të tradhtuar.”
HRW e qortoi Modin duke i thënë që të reflektonte se si përpjekja e Rusisë për të pushtuar Ukrainën i ngjan abuzimeve koloniale të kryera kundër Indisë përpara se të fitonte pavarësinë nga Mbretëria e Bashkuar në vitin 1947, duke përfshirë planet e Rusisë për të fshirë historinë dhe kulturën e Ukrainës.
Nga ana tjetër, HRW vuri në dukje se administrata e Modi ka “diskriminuar prej kohësh pakicat fetare, ka goditur shoqërinë civile dhe ka dështuar në mbrojtjen e të drejtave ekonomike dhe sociale”.
Modi është i vetëdijshëm për këto kritika dhe ai ka qenë në ballë të grindjeve të forta diplomatike me Shtetet e Bashkuara dhe Kanadanë për persekutimin dhe, në disa raste, gjoja vrasjen e separatistëve Sikh në tokë të huaj. Modi mund ta ketë të dobishme t’i kujtojë botës perëndimore se ai ka të paktën një mik që nuk do t’i japë kurrë leksione për të drejtat e njeriut.
Washington Post mori pikëpamjen më pesimiste nga të gjitha mediat të hënën, duke kombinuar vizitën e Modit në Moskë me vizitën e papritur të kryeministrit hungarez Viktor Orbán në Pekin në të njëjtën ditë me shfaqjen e shenjave të një “rendi botëror shumëpolar, joperëndimor”.
Edhe pse Modi nuk mund ta kishte planifikuar atë në këtë mënyrë, simbolika e mbërritjes së tij në Moskë vetëm disa orë pas një sulmi të egër me raketa rus në Kiev dhe qytete të tjera të mëdha të Ukrainës ishte e fuqishme.
Vetë Orbán bëri një vizitë në Moskë javën e kaluar, duke zemëruar krerët evropianë të cilët thanë se ai po dërgonte “sinjal të gabuar në botën e jashtme”, siç tha kryeministri suedez Ulf Kristersson. Modi po dërgon pothuajse të njëjtin mesazh, dhe të dy po luajnë me argumentin e Kinës dhe Rusisë se fuqitë perëndimore nuk mund të negociojnë paqen në Ukrainë.
VINI RE: Ky material është pronësi intelektuale e Breitbart
Përgatiti për Hashtag.al, Klodian Manjani
