Deputeti i PD, Ervin Salianji, në fjalën e tij në Komisionin e Sigurisë, tha se qeveria po bën sikur po punon, ndërkohë që në terren kontrollin e kanë grupet kriminale.
Ai përmendi disa incidente të fundit, duke përfshirë shpërthimet me tritol në Pogradec dhe Elbasan, si dhe vrasjet e pazbardhura në Memaliaj, që kanë traumatizuar qytetarët.
Salianji kritikoi Policinë e Shtetit për dështimin në kapjen dhe parandalimin e vrasjeve, si dhe për mos pastrimin e skenave të krimit.
Ai theksoi nevojën për një strukturë policore eficiente dhe propozoi shtyrjen e diskutimit të ligjit me 142 nene deri në shtator për të reflektuar propozimet e grupeve të interesit dhe shqetësimet e sindikatës.
Ervin Salianji: Qeveria bën sikur po bën ndonjë punë. Se për punët në terren e shikoni ju se kush e ka kontrollin në territor. Tritol sot në Pogradec, tritol para tre ditësh në Elbasan, një prej vrasësve më famëkeqë që e ka Departamenti i Mbrojtjes së Dëshmitarëve del edhe flet aty, katër vrasje të pazbardhura çuan në tre të vrarë të tjerë në Memaliaj.
E patë sesi Policia e Shtetit e kishte lënë për turp gjakun edhe trutë e njerëzve aty apo jo. Një ditë e ca pasi kishte përfunduar vrasja, le që nuk kap dot vrasësit, le që nuk i parandalon dot vrasjet, le që nuk i zbulon dot vrasjet, kur ka vrasje, por nuk pastron dot as skemën e krimit, që traumatizuan jo vetëm qytetarët e Memaliajt, por të gjithë ata që e panë në media.
Kështu që ky ligj, nëse doni që të krijohet një strukturë policore eficente, që të ketë mundësi që të jetë ligj që të gjejë zbatim, hajde e diskutojmë, të reflektohen propozimet që janë bërë nga grupet e interesit, ta shtyjmë në shtator, të reflektojmë dhe shqetësimet e sindikatës, por një pjesë kanë ardhur edhe tek ju edhe tek ne si anëtarë të këtij komisioni.
Policët janë lënë të pambrojtur dhe të pambështetur financiarisht dhe pa mbështetje sa i përket anës profesionale. Nëse bëjmë sikur dëgjojmë propozimet, besoj se nuk i bëhet shërbim interesit publik. Ky është ligj që ka 142 nene, nuk është ligj që kalon për dy ditë. Këtë propozim kam.
