Parlamenti izraelit dha miratimin paraprak të hënën për një projektligj që shpall organizatën kryesore të ndihmës së Kombeve të Bashkuara për palestinezët një organizatë terroriste dhe propozon ndërprerjen e marrëdhënieve me organin.
Vota kundër Agjencisë së Kombeve të Bashkuara për Ndihmën dhe Punën për Refugjatët Palestinez (UNRWA) është hapi i fundit në një shtytje izraelite kundër agjencisë, të cilën udhëheqësit izraelitë e kanë akuzuar për bashkëpunim me lëvizjen Hamas në Gaza.
Projektligji u miratua dhe do t’i kthehet Komisionit të Punëve të Jashtme dhe Mbrojtjes për shqyrtim të mëtejshëm, tha shërbimi i informacionit i parlamentit të vendit.
UNRWA ofron arsim, shëndetësi dhe ndihmë për miliona palestinezë në Gaza, Bregun Perëndimor, Jordani, Liban dhe Siri. Ajo ka pasur prej kohësh marrëdhënie të tensionuara me Izraelin, por marrëdhëniet janë përkeqësuar ndjeshëm që nga fillimi i luftës në Gaza dhe Izraeli ka kërkuar vazhdimisht që UNRWA të shpërbëhet.
“Është një përpjekje tjetër në një fushatë më të gjerë për të çmontuar agjencinë,” tha zëdhënësja e UNRWA Juliette Touma.
“Hapa të tillë janë të padëgjuar në historinë e Kombeve të Bashkuara”.
Izraeli ka thënë se qindra punonjës të UNRWA janë anëtarë të grupeve terroriste, duke përfshirë Hamasin dhe Xhihadin Islamik, por ende nuk ka dhënë prova.
Disa vende donatore ndërprenë fondet për UNRWA pas akuzave izraelite, por shumë prej tyre e kanë anuluar vendimin, duke përfshirë Britaninë e cila tha javën e kaluar se do rifillonte financimin.
Si Hamasi ashtu edhe Autoriteti Palestinez dënuan votimin izraelit dhe Hussein Al-Sheikh, një aleat i lartë i presidentit palestinez Mahmud Abbas, i bëri thirrje komunitetit ndërkombëtar t’i rezistojë përpjekjeve për të shpërbërë agjencinë.
