Bangladeshi pranon vendimin e gjykatës për të shkurtuar kuotat e vendeve të punës pas trazirave, lehtëson shtetrrethimin
Qeveria e Bangladeshit tha të martën se do merrte parasysh një vendim të Gjykatës së Lartë që 93% e vendeve të punës shtetërore të jenë të hapura për konkurrencë, duke përmbushur një kërkesë kyçe të studentëve pas një jave protestash më vdekjeprurëse të vendit në vite.
Por studentët ngritën kërkesa të reja, duke përfshirë heqjen e shtetrrethimit, rivendosjen e shërbimeve të internetit dhe rihapjen e kampuseve, duke lënë të paqartë nëse pranimi i vendimit të gjykatës nga qeveria do qetësonte plotësisht trazirat.
Qetësia relative mbizotëroi për të dytën ditë radhazi në kryeqytetin Daka dhe në shumicën e qyteteve kryesore, megjithëse shefi i ushtrisë tha se siguria ende nuk ishte rivendosur plotësisht pasi ai vëzhgoi kryeqytetin me helikopter.
Qeveria njoftoi një lehtësim të shtetrrethimit të vendosur për të ndihmuar në frenimin e trazirave, duke e hequr atë nga e mërkura midis orës 10:00 dhe 17:00 për t’i lejuar njerëzit të bëjnë blerje për gjërat thelbësore, ndërsa zyrat do rihapen midis orës 11:00 dhe 15:00.
Autoritetet e Bangladeshit mbyllën gjithashtu internetin celular dhe vendosën ushtrinë në rrugë pas përleshjeve midis protestuesve dhe forcave të sigurisë që u përhapën në vendin e Azisë Jugore me 170 milionë banorë.
Pothuajse 150 njerëz janë vrarë në dhunën që shpërtheu dhe më shumë se 1600 janë arrestuar në dy qytetet kryesore Daka dhe Chittagong.
Protestat u ndërprenë pasi Gjykata e Lartë vendosi të dielën në favor të një apeli nga qeveria e kryeministres Sheikh Hasina dhe urdhëroi që 93% e vendeve të punës të jenë të hapura për kandidatët sipas meritës.
“Qeveria ka vepruar në përputhje me vendimin e Gjykatës së Lartë,” u tha gazetarëve ministri Anisul Huq, duke treguar njoftimin e gazetës zyrtare për këtë qëllim.
Qeveria e Hasinës hoqi kuotat në vitin 2018, të cilat kishin rezervuar 56% të vendeve të punës shtetërore për kategori të ndryshme njerëzish, duke përfshirë 30% për familjet e atyre që luftuan në luftën e pavarësisë së vendit kundër Pakistanit në vitib 1971. Por një vendim i Gjykatës së Lartë rivendosi kuotat muajin e kaluar, duke shkaktuar protestat e studentëve.
