Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka përfunduar hetimet dhe ka ngritur akuzat për shtetasen shqiptare Jozefina Gjoni dhe shtetasit e huaj Saverio Ciampi, Claudio Cuchi, dhe Manrico Erriu.
Të katërt akuzohen për veprën penale të ‘Pastrimit të produkteve të veprës penale ose veprimtarisë kriminale’, e kryer në bashkëpunim, sipas nenit 287, paragrafi i dytë të Kodit Penal.
Hetimet e kryera mbi procedimin penal nr.1950 të vitit 2021 zbuluan se personat e përfshirë janë gjithashtu nën hetim nga autoritetet spanjolle për krime ekonomike. Ata dyshohet se kanë krijuar kompani në Shqipëri për të pastruar paratë e fituara në mënyrë të paligjshme në Spanjë, si dhe në vende të tjera si Italia dhe Zvicra.
Prokuroria e Tiranës ka arritur ne perfundimin se të pandehurit kanë investuar paratë e fituara në mënyrë të paligjshme në Spanjë në shoqëri në Shqipëri, duke përfituar nga veprimtaria e paligjshme. Aktakuza tani do të shqyrtohet në gjykatë, ku do të vendoset për masat e mëtejshme ligjore.
Njoftimi i Prokurorisë:
Krijuan në Shqipëri kompani për të pastruar paratë e fituara në mënyrë të paligjshme në Spanjë, Prokuroria e Tiranës përfundon hetimet dhe ngre akuza për 1 shtetase shqiptare dhe tre të huaj
Prokuroria pranë Gjykatës së Shkallës së Parë të Juridiksionit të Përgjithshëm, Tiranë përfundoi hetimet për shtetasen Jozefina Gjoni, dhe shtetasit e huaj Saverio Ciampi, Claudio Cuchi, dhe Manrico Erriu, nën akuzë për veprën penale të ‘Pastrimi i produkteve të veprës penale ose veprimtarisë kriminale’ e kryer në bashkëpunim parashikuar nga neni 287, paragrafi i dytë i Kodit Penal.
Nga hetimet e kryera mbi procedimin penal nr.1950, të vitit 2021, rezultoi se personat në fjalë janë nën hetim edhe nga autoritetet Spanjolle për krime ekonomike nëpërmjet kompanive të ndryshme në Tenerife, Spanjë.
Referuar aktit të ekspertimit kontabël, kryer në dobi të hetimit, u provua përtej çdo dyshimi të arsyeshëm se të gjithë të pandehurit kanë bashkëpunuar mes tyre duke krijuar shoqëri në Shqipëri, për pastrimin e parave të fituara në mënyrë të paligjshme në Spanjë, apo edhe në vende të tjera si Italia apo Zvicra, duke qenë se nga akti i ekspertimit rezultoi se janë kryer transaksione financiare midis shoqërive që kanë të njëjtin emër shqiptare apo të huaja.
Nga hetimi rezultoi se nëpërmjet krijimit të shoqërive tregtare si dhe nëpërmjet qarkullimit të parave në bankë, këto shtetas kanë tentuar të pastrojnë produktin e veprës penale, duke e simuluar veprimtarinë e kryer prej tyre si të ligjshme. U provua se shoqëritë në Shqipëri, të cilat kanë shërbyer për të pandehurit për të kryer veprën penale të parashikuar nga neni 287 i Kodit Penal, janë krijuar pasi më parë këto shtetas kanë krijuar shoqëri të tjera në Spanjë, për të cilat janë në hetim për kryerjen e veprës penale të “Mashtrimit”.
Ky fakt provohet jo vetëm nga datat e themelimit të shoqërive në Shqipëri, por edhe mbi faktin se disa prej shoqërive të krijuara në Shqipëri, janë shoqëri bija të atyre të huaja dhe mbajnë të njëjtin emër.
Të pandehurit me dashje kanë krijuar shoqëri në Shqipëri, duke investuar paratë e përfituara në mënyrë të paligjshme në Spanjë duke nxjerrë edhe përfitime nga veprimi i paligjshëm i bërë prej tyre.
