Linjat hekurudhore franceze janë sulmuar disa orë para ceremonisë olimpike, duke pësuar zjarrëvënie në disa vende.
Vandalët shënjestruan rrjetin e trenave të shpejtësisë së lartë të Francës me një sërë veprimesh të koordinuara që sollën ndërprerje të mëdha në disa prej linjave hekurudhore më të ngarkuara të vendit përpara ceremonisë së hapjes së Lojërave Olimpike të Parisit të premten.
Operatori shtetëror hekurudhor tha se zjarrvënësit kishin shënjestruar instalimet përgjatë linjave që lidhin Parisin me qytete të tilla si Lille në veri, Bordeaux në perëndim dhe Strasburg në lindje.
Ai u bëri thirrje të gjithë udhëtarëve që të shtyjnë udhëtimet e tyre. Riparimet ishin duke u zhvilluar, por trafiku do të ndërpritet rëndë të paktën deri në fund të fundjavës. Trenat po ktheheshin në pikat e tyre të nisjes.
“Natën e kaluar, SNCF ishte viktimë e disa akteve vandalizmi në linjat e shpejtësisë së lartë në Atlantik, Veri dhe Lindje. Zjarret ishin vënë qëllimisht për të dëmtuar instalimet tona,” tha SNCF në një deklaratë, përcjell Reuters.
Sulmet e koordinuara në rrjetin hekurudhor do të ngjallin një ndjenjë ankthi përpara ceremonisë së hapjes së Lojërave Olimpike në zemër të Parisit më vonë të premten.
Franca po zhvillon një operacion të paprecedentë sigurie në kohë paqeje për të siguruar ngjarjen, me më shumë se 45,000 policë, 10,000 ushtarë dhe 2,000 agjentë privatë të sigurisë të vendosur. Snajperët do të jenë në çati dhe dronët do të mbajnë vëzhgim nga ajri.
Paris 2024 tha se po punonte ngushtë me SNCF për të vlerësuar situatën.
Nuk kishte asnjë pretendim të menjëhershëm të përgjegjësisë dhe asnjë tregues nëse veprimi kishte lidhje politike.
Ministri i Transportit Patrice Vergriete i përshkroi aktet si kriminale. Shefi i policisë së Parisit tha se ai po forconte edhe më tej sigurinë në stacionet kryesore të kryeqytetit.
Ministrja e Sportit Amelie Oudea-Castera dënoi vandalizmin.
“Është krejtësisht e tmerrshme,” tha ajo për BFMTV. “Të sulmosh sportin është të sulmosh Francën”.
