G20 tha të premten se grupi ra dakord të punonte për t’u siguruar që individët super të pasur në mbarë botën të tatohen në mënyrë efektive, por u ndal në elaborimin e metodave.
Grupi tha se është e rëndësishme që të gjithë tatimpaguesit, përfshirë individë me vlerë shumë të lartë neto, të kontribuojnë pjesën e tyre të drejtë në taksa, përcjell Anadolu.
“Shmangia agresive e taksave ose evazioni fiskal i individëve me vlerë jashtëzakonisht të lartë neto mund të dëmtojë drejtësinë e sistemeve tatimore, e cila vjen së bashku me një efektivitet të reduktuar të taksimit progresiv,” sipas një Deklarate ministrore të G20 për Bashkëpunimin Ndërkombëtar Tatimor.
“Askush nuk duhet të jetë në gjendje të shmangë tatimin, duke anashkaluar standardet e transparencës. Prandaj, duhet të bëhen përpjekje më të mëdha për të siguruar përputhjen e plotë me detyrimet e brendshme tatimore,” shtoi ai.
Pavarësisht konsensusit për taksimin e super të pasurve, mekanizmat e arritjes së qëllimit mbeten të paqarta.
“Çdo juridiksion duhet të punojë në mënyrë autonome ose, nëse është e nevojshme, përmes nismave për ndërtimin e kapaciteteve për të përmirësuar efektivitetin e mbledhjes së të ardhurave për taksat, të cilat tashmë sot mund të vendosen bazuar në ligjin e brendshëm,” tha grupi.
“Bashkëpunimi mund të përfshijë shkëmbimin e praktikave më të mira, inkurajimin e debateve rreth parimeve tatimore dhe krijimin e mekanizmave kundër shmangies, duke përfshirë adresimin e praktikave tatimore potencialisht të dëmshme,” shtoi ai.
Vendet anëtare thanë se do të vazhdojnë të diskutojnë çështjet në G20 dhe forume të tjera përkatëse, duke llogaritur në kontributin teknik të organizatave ndërkombëtare përkatëse, akademisë dhe ekspertëve.
