Komiteti financiar parlamentar i Rusisë ka miratuar tregtimin eksperimental të shkëmbimit të kriptovalutave që do rregullohen nga Banka Qendrore e vendit, raportoi Interfax të premten, duke cituar projektligjin përkatës.
Sipas raportit, Banka e Rusisë do jetë në gjendje të vendosë rregullat për tregtimin e monedhave dixhitale në kuadër të projektit pilot.
Rregullat thuhet se do specifikojnë se si pranohen monedhat dixhitale dhe do vendosin kërkesat për ata që mbikëqyrin tregtimin.
Në leximin e parë të projektligjit, u propozua që rregullatorit t’i jepet autoriteti për të kryer një eksperiment mbi shlyerjet në monedhat dixhitale për aktivitetin ekonomik të huaj. Deputetët tani kanë propozuar zgjerimin e autoritetit të rregullatorit.
Legjislacioni thuhet se autorizon Bankën Qendrore të ndërtojë një platformë elektronike eksperimentale për transaksionet me monedhat dixhitale bazuar në Sistemin Kombëtar të Pagesave (NPS) duke filluar nga 1 shtatori.
Ministria e Financave kishte propozuar më parë legalizimin e shkëmbimeve të kriptove në Rusi. Megjithatë, ajo nuk arriti një marrëveshje me bankën qendrore.
Ekspertët thonë se legjislacioni i ri është një hap i rëndësishëm drejt përfshirjes së monedhave dixhitale në infrastrukturën bankare dhe tregtare të Rusisë, duke vënë në dukje se mund të hapë rrugën për pranim dhe rregullim më të gjerë në të ardhmen.
Të mërkurën, Duma e Shtetit miratoi një projektligj për legalizimin e “minierave” të kriptomonedhave në vend. Legjislacioni parashikon që qeveria, në bashkëpunim me bankën qendrore, do vendosë rregullore për individët dhe personat juridikë të angazhuar në nxjerrjen e monedhave dixhitale.
