Kreu i PDIU-së Shpëtim Idrizi, është zemëruar me PS-në dhe PD-në.
Indinjata e tij e fundit ka të bëjë me kandidatët që dy forcat politike kanë hedhur në fushën e betejës për Bashkinë e Himarës në zgjedhjet e 4 gushtit.
Idrizi, shkruan në Facebook se kandidatët e PD-së dhe PS-së u drejtohen në gjuhën greke votuesve ndërkohë që bashkia e HImarës nukë shtë minoritare.
Idrizi pyet se kushdo nga kandidatët të fitojë në Himarë mund të përdoret për të ngritur pretendimet e njohura greke për Vorio-Epirin.
Ai sqaron më tej se nuk ka mundësi që Epiri i Veriut të jetë i banuar nga grekët kur Epiri i Jugut nuk ka qenë asnjëherë i banuar nga helenët.
Më tej ai sjell disa pasazhe duke cituar historianë antikë për të shpjeguar gjeografikisht e historikisht rajonin duke ironizuara ata që i quan “vorio-epiresha”.
Reagimi i Idrizit
“Zgjedhjet në Bashkinë e Himarës po konsiderohen si në një bashki minoritare e me kandidatë minoritarë grekë.
#HimaraËshtëShqiptare
90 % e banuar nga shqiptarë.
10 % romë, vllehë e greqisht-folës.
Të dielën zgjidhet kryebashkiaku.
A dini gjë kujt i drejtohen këta kandidatët e PD-së dhe PS-së në gjuhën greke kur bashkia e Himarës nuk është minoritare?
Këta kandidatët e PD-së dhe PS-së bëjnë mirë të flasin greqisht në shtëpitë e tyre.
A ju kujtohen zgjedhjet lokale të 2003-t kur PS dhe PD u bënë bashkë kundër Bollanos e vorio-epireshave?
A rrezikojmë që kushdo të fitojë nga këta, Himara të kthehet në kryedashin për Vorio-Epirin?
Dy fjalë për këtë Vorio-Epirin dhe vorio-epireshat…
Po si ka mundësi që Epiri i Veriut qenka i banuar nga grekët, kur Epiri i jugut (Çamëria, Janina, Follorina e Konica) janë të banuara që kur është njohur njerëzimi, nga jo-helenë?!!!!
Në 340-n p.e.s Straboni në veprën e njohur “Gjeografia e Kohës” përshkruan se helenët shtrihen deri në gjirin e Ambrakisë (sot Gjiri i Artës), pastaj jetojnë barbarët, pra jo-helenët.
Tuqiditi në veprën “Lufta e Peloponezit i përshkruan prapë Helenët deri në Gjirin e Ambrakisë. Epiri banohej nga jo helenët e fiset ilire: Thesprotët, Kaonët, Molosët, me Lidhjen Epiriote e Pirron e Epirit, Despotatin e Artës me despotët Gjin Bue Shpata e Pjetër Losha, që në shekullin 13 ndaluan dyndjet sllave në Ballkan. Çamëria e Abedin Pashë Dinos, Hasan Tahsinit, Muharrem e Haki Rushitit, Alush e Osman Takës, Çaparejve, Suliotëve, tre firmëtarëve të Pavarësisë, Musa e Ali Demit, Kol Idromenos, Mitrush Kutelit, Daut Hoxhës, Rauf Dinos e Beut Rexho Plakut, Bilal Xhaferrit e shumë e shumë figurave të shquara.
Çamëria iu aneksua Greqisë vetëm në vitin e mbrapshtë 1913 nga Konferenca e Ambasadorëve në Londër, ashtu siç Kosova iu aneksua Serbisë. Vetëm në Mars të vitit 1913, Çamëria u pushtua me zjarr dhe me hekur nga Greqia.
Që nga antikiteti e deri në Mars të vitit 1913 nuk ka pasur asnjëherë debat historik se çfarë ishte Epiri; pra vazhdimësi Iliro-Shqiptare (Çame). Këto dy fjalë i kisha për Vorio-Epireshat dhe ata që i dëgjojnë e ngrohen në diell…”
