Atika verilindore në Greqi e gjeti veten në mëshirën e zjarreve edhe këtë vit.
Pas dy ditësh luftimi me zjarret që shtriheshin në dhjetëra kilometra, zjarrfikësit u përballën dhe vazhduan të luftonin me flakët në zona të shumta në ditën e tretë.
Disa zona mbeten pa ujë dhe energji elektrike, pasi dëmet në infrastrukturë janë të shumta. Një nga zonat e prekura rëndë është Varnavas, ku ka nisur zjarri.
“Kam kursyer atë që kam mundur nga shtëpia. Na thanë se rryma do të kthehet për rreth një muaj dhe ne nuk dimë asgjë për ujin,” tha një banor i zonës, përcjell Euronews.
Ekspertët po paralajmërojnë tani se rreziku i shkretëtirëzimit të Atikës është i madh pasi vlerësohet se 40% e pyllit përreth ka humbur vitet e fundit me makthin e zjarrtë që përsëritet.
Llogaritja e dëmeve tashmë ka filluar dhe shqetësimi mbetet pasi temperaturat janë ende shumë të larta.
“Është një përvojë e frikshme, sigurisht, dhe është traumatike të shohësh se çfarë po ndodh me fqinjët e tu, pronën e tyre dhe malin e bukur ku jetojmë. Është shumë e trishtueshme,” tha një grua vendase që duhej të evakuohej.
Zjarri, duke kaluar nëpër një zonë të madhe pyjore prej rreth 20 kilometrash, ka arritur në strukturën urbane. Në periferi të Vrillisë, flakët kërcënuan nga tre fronte të ndryshme.
”Pylli ishte pastruar nga bimësia e ulët dhe krasitja ishte bërë edhe në pjesën e sipërme të pishave, është një krasitje e pemëve në lartësinë 2-2,5 metra, që të mos ketë gjithë këtë lëndë djegëse dhe të mos përhapet zjarri në një mënyrë që mos të krijonte probleme shumë të mëdha”, shpjegoi kryetari i Bashkisë Vrilissia, Giannis Pismisis.
Shumë shtëpi u dogjën dhe u shkatërruan edhe në Nea Penteli. Palestra e mbyllur e qytetit dhe një shkollë pranë saj kanë pësuar dëmtime të rënda.
Zjarri në periferitë veriore të Athinës, shkaktoi evakuime të shumta dhe la të paktën një person të vdekur.
Me erërat e forta që përhapni flakët të dielën dhe të hënën duke u shuar gjatë natës, departamenti i zjarrfikësve tha se zjarri nuk kishte më asnjë front aktiv, duke avancuar dhe zjarrfikësit u fokusuan në shuarjen e qindra zonave me djegie të ngadalta.
Përforcime të avionëve që hidhnin ujë dhe zjarrfikës shkuan nga jashtë pasi Greqia kërkoi ndihmë nga mekanizmi i përbashkët evropian për reagim ndaj fatkeqësive.
Dhjetëra shtëpi dhe biznese raportohet se janë djegur, megjithëse autoritetet nuk kanë ende një numër të saktë. Erërat u forcuan sërish pasditen e së martës, por nuk u raportuan shpërthime të reja të mëdha.
Shërbimi i Menaxhimit të Emergjencave të Bashkimit Evropian, Copernicus, i cili ofron shërbime hartash për fatkeqësitë natyrore duke përdorur imazhe satelitore, tha se deri të hënën zjarri kishte djegur 8,500 hektarë.
