Gjykata Kombëtare e Spanjës ka vendosur ekstradimin e ish-kreut të bandës së Durrësit, Lulzim Berisha në Shqipëri.
Lulzim Berisha, i cili përfaqësohet nga dy avokatë spanjollë, ka të drejtën për të apeluar vendimin e Gjykatës Kombëtare në Gjykatën e Lartë të Spanjës.
Vendimi vjen pas gjyqit të parë të zhvilluar më 2 korrik, ku Lulzim Berisha doli para Gjykatës Kombëtare Spanjolle dhe kërkoi që të mos ta dorëzonin në Shqipëri për t’u gjykuar.
Lulzim Berisha, një nga të arratisurit më të kërkuar nga autoritetet shqiptare ia akuzuar se ka planifikuar dhe urdhëruar vrasjen e tre personave në vitin 2005 në dy sulme, tha se kishte frikë për jetën e tij sepse pret një hakmarrje të mundshme për veprimet e tij të kaluara.
Por sipas Prokurorisë spanjolle Lulzim Berishës i rrezikohet jeta vetëm jashtë burgut, dhe duke ua dorëzuar Lulzim Berishën, autoriteteve shqiptare, ai nuk do të rrezikohet.
Organi i akuzës kërkoi dorëzimin e tij në mënyrë që Shqipëria ta gjykonte për dy sulmet, por jo që të vuajë një dënim mbi 6 vjet. Ai ka pesë vrasje të tjera në pritje pasi që kjo çështje nuk është studiuar në kohën e kësaj seance.
Në deklaratën e saj të konkluzioneve të përkohshme, të mbledhura nga Europa Press, Zyra e Prokurorit kujtoi se i pandehuri, i cili u arrestua në vitin 2023 në Alicante, në fillim të shkurtit 2005 “ishte përgjegjës për gjetjen e personave të përshtatshëm për shkak të lidhjeve të tyre shoqërore dhe farefisnore. Për të eliminuar fizikisht një burrë, për çka ka pasur ndihmën e tre personave që kanë kryer aksionin më 26 shkurt 2005 rreth orës 22:00. Ka qenë në autostradën Tiranë-Durrës, në afërsi të Koxhaj, kur të tre personat e kanë qëlluar me armë teksa po drejtonte automjetin e tij. Si pasojë e të shtënave viktima ka gjetur vdekjen, duke rënë në kanalin e rrugës, ku njëri prej autorëve e ka qëlluar sërish”, thotë Prokuroria.
Lulzim Berisha, “pas planifikimit dhe organizimit të vrasjes, është larguar nga Shqipëria dhe është kthyer pak ditë pas ngjarjes”, sqarohet në letër. Më 27 shkurt të po atij viti, në të njëjtin qytet, ka ndodhur një shpërthim në kabinën e ashensorit të një pallati në Tiranë, kryeqytetin e vendit. Për pasojë kanë humbur jetën dy shtetas.
Prokuroria sqaron se në realitet ky shpërthim ishte planifikuar nga Berisha dhe se “aktivizimi i eksplozivit është bërë përmes celularit”. “Provat tregojnë se i pandehuri dhe tre persona të tjerë pasi kanë marrë lëndën plasëse dhe e kanë përgatitur duke vendosur një aparat telefonik që përdorej për aktivizimin e tij, ia kanë vënë në dispozicion një personi tjetër për të kryer shpërthimin në atë moment, përfundon ai”. Siç shpjegohet nga Policia Kombëtare në kohën e arrestimit të tij në Alicante, të dy sulmet ishin një larje hesapesh midis klaneve rivale që ndodhën në vitin 2005 dhe u zgjidhën 15 vjet më vonë.
