Kompania kanadeze e minierave Lucara Diamond ka pohuar se ka gjetur diamantin e dytë më të madh të zbuluar ndonjëherë në Tokë.
Në një deklaratë në faqen e saj zyrtare të mërkurën, kompania raportoi se guri i çmuar peshon në një masë të jashtëzakonshme prej 2,492 karatësh.
Diamanti thuhet se është gjetur në minierën e diamanteve Karoëe të Lucaras në Botsvana. Ai u zbulua dhe u rikuperua duke përdorur teknologjinë e kompanisë “Mega Diamond Recovery Transmission” me rreze X (XRT), të cilën e ka përdorur që nga viti 2017 për të identifikuar dhe ruajtur diamante të mëdhenj me vlerë të lartë.
“Ne jemi të entuziazmuar për rikuperimin e këtij diamanti të jashtëzakonshëm 2,492 karatësh. Ky zbulim jo vetëm që tregon potencialin e jashtëzakonshëm të minierës sonë Karoëe, por gjithashtu mbështet investimin tonë strategjik në teknologjinë më të fundit XRT. Aftësia për të rikuperuar një gur kaq masiv dhe me cilësi të lartë të paprekur tregon efektivitetin e qasjes sonë ndaj rikuperimit të diamantit,” tha presidenti dhe shefi i Lucaras, William Lamb në një deklaratë.
Më parë, e njëjta kompani kishte nxjerrë edhe diamantin Sewelo 1,758 karatësh në 2019 dhe Lesedi La Rona 1,109 karatësh në 2015 në të njëjtën minierë.
Rekordi për diamantin më të madh të nxjerrë ndonjëherë i përket ende diamantit Cullinan 3,106 karatësh, i cili u zbulua në vitin 1902 në Afrikën e Jugut dhe më vonë u pre në mbi 100 gurë, duke përfshirë Cullinan I 530,5 karatësh, diamanti më i madh i prerë në botë. Guri i çmuar është montuar në kokën e Skeptrit me Kryqin e Bizhuterive të Kurorës së Anglisë.
