Partia qeverisëse në Gjeorgji është zotuar të nxjerrë jashtë ligjit pothuajse të gjithë kundërshtarët e saj politikë nëse fiton zgjedhjet parlamentare këtë vit.
Ky veprim ka të ngjarë të ngrijë rrugën e Gjeorgjisë për t’u bashkuar me BE-në, pas përplasjeve të fundit midis Tbilisit dhe Brukselit për të drejtat e njeriut dhe sundimin e ligjit.
Të premten, kryeministri Irakli Kobakhidze tha se qeveria do të kërkojë të ndalojë disa parti pas votimit kritik mbarëkombëtar të tetorit.
Kjo vjen disa ditë pasi partia në pushtet Ëndrra Gjeorgjiane kërcënoi se do të shpërndante grupimin më të madh të opozitës në parlament, Lëvizjen e Bashkuar Kombëtare (UNM) e cila u themelua nga ish-presidenti gjeorgjian Mikheil Saakashvili.
Përveç UNM-së, fraksionet e tjera pro-perëndimore me vende në parlament do përballen me mbyllje, tha Kobakhidze, sepse “në realitet, janë të gjitha një forcë politike”. Çdo deputet i zgjedhur në platformat e tyre, tha ai, do të ndalohet të marrë detyrën.
“Besoj se heqja e mandateve [parlamentare] do të jetë vazhdimi logjik i nxjerrjes jashtë ligjit të këtyre partive. Anëtarët kriminalë të forcave politike kriminale nuk duhet të ushtrojnë statusin si ai i një deputeti të parlamentit të Gjeorgjisë”, tha Kobakhidze.
POLITICO iu drejtua Komisionit Evropian për komente mbi planet e Kobakhidze, të cilat ai pretendon se nuk do të pengojnë anëtarësimin në BE, por nuk mori një përgjigje të menjëhershme.
“Kjo do të ndalojë efektivisht të gjithë opozitën që Ëndrra Gjeorgjiane e sheh si kërcënim,” tha Tinatin Akhvlediani, një studiues në Qendrën për Studime të Politikave Evropiane. “Të ngjashmit e vetëm për këtë lloj gjëje janë Alexander Lukashenko në Bjellorusi, dhe Korea e Veriut – do të ishte fundi i demokracisë së Gjeorgjisë”.
Partitë e opozitës kanë kërkuar të bashkojnë forcat përpara votimit për të mposhtur Ëndrrën Gjeorgjiane, e cila është përballur me protesta të gjera në rrugë gjatë muajve të fundit mbi futjen e një ligji të stilit rus që i cilëson OJQ-të dhe mediat e mbështetura nga perëndimi si “agjentë të huaj”.
Kobakhidze hodhi poshtë sugjerimet se vendi mund të zbriste në një diktaturë, duke pretenduar se Ukraina dhe Moldavia i kishin ndaluar partitë politike pa djegur urat e tyre me Perëndimin. “E njëjta gjë do të ndodhë në rastin e Gjeorgjisë,” tha ai.
Dy vendet e Evropës Lindore kanë ndaluar fraksione specifike pro-Moskës në vazhdën e luftës së Rusisë kundër Ukrainës dhe mes paralajmërimeve se ata kishin punuar për të organizuar grusht shteti – por të dyja kanë ruajtur ende sisteme të gjalla shumëpartiake.
Tina Bokuchava, udhëheqësja e UNM, i tha POLITICO-s në fillim të kësaj jave se masa për të nxjerrë jashtë ligjit partinë e saj dëshmoi se Ëndrra Gjeorgjiane është bërë një “qeveri autoritare e stilit Putin”.
BE-ja ka ngrirë aplikimin e Gjeorgjisë për anëtarësim në bllok mes paralajmërimeve për kthim prapa në lidhje me të drejtat e njeriut, ndërsa SHBA-ja ka pezulluar fondet shumë të nevojshme për vendin e Kaukazit Jugor për shkak të orientimit të tij drejt Kremlinit.
