Policia gjermane është në kërkim të një agresori të panjohur pas një sulmi me thikë që ndodhi të premten mbrëma në një festival në qytetin Solingen, në Gjermaninë perëndimore.
Sulmi la tre persona të vdekur dhe tetë të tjerë të plagosur, pesë prej të cilëve në gjendje të rëndë, sipas një deklarate të policisë të shtunën herët në mëngjes.
Numri i të plagosurve në gjendje të rëndë ishte rritur nga katër që ishte raportuar më parë.
Ngjarja ndodhi rreth orës 9:40 të mbrëmjes të premten, kur një burrë sulmoi disa njerëz me një thikë në sheshin Fronhof, një shesh tregu në qendër të qytetit. Policia raportoi se agresori synonte në mënyrë specifike grykët e viktimave të tij. Deri tani, policia nuk ka arritur të sigurojë detaje të tjera për identitetin ose motivin e sulmuesit.
Në një postim në X, ministrja e Brendshme e Gjermanisë, Nancy Faeser, deklaroi: “Autoritetet tona të sigurisë po bëjnë gjithçka për të kapur autorin dhe për të hetuar prapaskenat e sulmit”.
Ajo gjithashtu shprehu ngushëllime për familjet e viktimave dhe të plagosurve, përcjell Reuters.
Sulmi ndodhi gjatë një festivali që shënonte 650-vjetorin e themelimit të qytetit në shtetin e North Rhine-Westphalia, që kufizohet me Holandën. Rreth 10,000 njerëz ishin mbledhur në sheshin Fronhof, ku po performonin grupe të ndryshme muzikore.
Muzikanti gjerman i njohur si Topic ishte duke performuar në një skenë pranë vendit të ngjarjes kur ndodhi incidenti. Në një postim në Instagram, ai tregoi se ishte njoftuar për atë që kishte ndodhur, por iu kërkua të vazhdonte performancën “për të shmangur shkaktimin e një paniku masiv”.
Pas kësaj, ai u informua që të ndalonte dhe, “pasi agresori ishte ende në arrati, ne u fshehëm në një dyqan aty pranë, ndërsa helikopterët e policisë fluturonin mbi ne,” shkroi ai.
Autoritetet anuluan pjesën e mbetur të festivalit të fundjavës. Policia po ashtu njoftoi se kishte hapur një faqe interneti për njerëzit që të dërgonin pamje ose informacione në lidhje me sulmin.
Sulme me thikë dhe armë zjarri janë relativisht të rralla në Gjermani. Qeveria deklaroi më herët këtë muaj se dëshironte të forconte rregullat për thikat që mund të mbahen në publik, duke reduktuar gjatësinë maksimale të lejuar.
Në qershor, një polic 29-vjeçar vdiq pasi u godit me thikë në Mannheim gjatë një sulmi mbi një demonstratë të djathtë. Një sulm me thikë në një tren në vitin 2021 plagosi disa persona.
Ministri i Brendshëm i North Rhine-Westphalia, Herbert Reul, vizitoi vendin e ngjarjes të shtunën herët në mëngjes. Ai u tha gazetarëve se ishte një sulm i qëllimshëm mbi jetën njerëzore, por refuzoi të spekulojë për motivin.
Gjatë një konference për shtyp, autoritetet thanë se “shumë dëshmitarë janë në gjendje shoku dhe po marrin kujdes dhe po japin deklaratat e tyre”.
Policia shpreson të marrë informacion për agresorin, veçanërisht për pamjen e tij, në mënyrë që kërkimi të jetë më i saktë. Dëshmitarët thanë se njerëzit qëndruan të qetë ndërsa largoheshin nga vendi i ngjarjes dhe pamjet e medias më vonë treguan se sheshi ishte bosh, përveç makinave të policisë dhe emergjencës.
Organizatori i festivalit, Philipp Müller, kërkoi nga turma të mos panikojnë dhe të kenë kujdes duke u larguar nga vendi, pasi sulmuesi ishte ende në liri. Policia e Solingen, një qytet me rreth 160,000 banorë, i vendosur pranë qyteteve më të mëdha të Këlnit dhe Dyseldorfit, po vazhdon kërkimin intensiv për të kapur sulmuesin e panjohur.
