Forcat ushtarake izraelite kanë njoftuar se kanë vrarë kreun e grupit të armatosur palestinez Hamas në Jenin dhe dy luftëtarë të tjerë, ndërsa një operacion i madh vazhdon për ditën e tretë në veri të Bregut Perëndimor të okupuar.
Sipas një deklarate, forcat izraelite të sigurisë “u ndeshën dhe eliminuan” Wissam Khazem në një automjet dhe më pas kryen sulme ajrore ndaj “dy terroristëve të tjerë teksa përpiqeshin të arratiseshin”.
Ministria e Shëndetësisë e Palestinës njoftoi se tre burrat u vranë gjatë natës pranë qytetit të Zababdeh, në juglindje të Jeninit, sipas BBC.
Mediat palestineze raportuan gjithashtu se forcat izraelite janë tërhequr nga Tulkarme pasi shkaktuan dëme të rënda në ndërtesa dhe infrastrukturë në kampet e refugjatëve të qytetit.
Nuk pati ndonjë koment të menjëhershëm nga ushtria izraelite, e cila të enjten njoftoi se kishte vrarë pesë anëtarë të grupeve të armatosura në Tulkarm, përfshirë liderin e tyre lokal.
Ushtria njoftoi gjithashtu se forcat ishin tërhequr nga kampi i refugjatëve al-Faraa pranë Tubasit pasi përfunduan atë që e quajtën “objektivi i pengimit të terrorit, zbulimit të infrastrukturës terroriste dhe eliminimit të terroristëve të armatosur”.
Sipas ministrisë së shëndetësisë së Palestinës, të paktën 19 palestinezë janë vrarë që nga fillimi i operacionit izraelit, i cili është një nga më të mëdhenjtë në Bregun Perëndimor në dy dekada.
Me luftën në Gaza që vazhdon, kjo situatë ka shkaktuar alarm ndërkombëtar.
Mbretëria e Bashkuar tha të premten se ishte “thellësisht e shqetësuar nga metodat që ka përdorur Izraeli dhe nga raportet për viktima civile dhe shkatërrimin e infrastrukturës civile”.
“Rreziku i destabilitetit është serioz dhe nevoja për de-eskalim është urgjente,” tha një zëdhënës i Ministrisë së Jashtme.
Sekretari i Përgjithshëm i OKB-së, Antonio Guterres, paralajmëroi të enjten se bastisjet “po ushqejnë një situatë tashmë shpërthyese”.
Ka pasur një rritje të dhunës në Bregun Perëndimor që nga sulmi vdekjeprurës i Hamasit ndaj Izraelit më 7 tetor dhe lufta që pasoi në Gaza. Qindra palestinezë janë vrarë ndërsa forcat izraelite kanë intensifikuar bastisjet e tyre, duke thënë se po përpiqen të ndalojnë sulmet vdekjeprurëse të palestinezëve ndaj izraelitëve në Bregun Perëndimor dhe në Izrael.
