Kompania e sigurimit e e superjahtit ‘Bayesian’ që u mbyt këtë muaj në brigjet e Siçilisë, duke vrarë sipërmarrësin e teknologjisë, Mike Lynch dhe gjashtë të tjerë, mund të duhet të paguajë të paktën 150 milionë dollarë, sipas vlerësimeve të para nga ekspertët e industrisë.
Jahti i gjatë 56 metra me flamur britanik, i cili ekspertët vlerësuan se kushtonte rreth 40 milionë dollarë, u përmbys më 19 gusht brenda pak minutave pasi u godit nga një stuhi në orët e para të mëngjesit ndërsa ishte ankoruar pranë bregdetit të ishullit italian.
Trupi i superjahtit ishte i siguruar kundër dëmtimeve fizike nga ofruesi i sigurimit të jahteve OMAC dhe një konsorcium siguruesish, përfshirë Travelers Companies, Navium Marine dhe Convex, raportoi Reuters javën e kaluar.
Sigurimi i tij i mbrojtjes dhe dëmshpërblimit (P&I), i cili zakonisht mbulon pretendimet e përgjegjësisë ndaj palëve të treta, duke përfshirë dëmtimin mjedisor, lëndimin dhe vdekjen, u sigurua nga British Marine.
Trupi ka të ngjarë të ishte i siguruar për rreth 40 milionë dollarë, ndërsa mbulimi i plotë P&I është më i madh, thanë burimet e sigurimit.
“Kostoja e anijes është midis 40 dhe 50 milionë dollarë, kështu që kufiri i dëmshpërblimit të trupit dhe makinerive ishte ndoshta rreth këtyre vlerave,” tha Marcos Alvarez, drejtor menaxhues në Morningstar DBRS.
Sigurimi P&I ka të ngjarë të jetë “shumëfish” i sigurimit të trupit, ose 200-300 milionë dollarë, shtoi Alvarez, duke vënë në dukje se gjithashtu ka të ngjarë të mbulojë pagesat e detyrimeve edhe nëse kapiteni ose ekuipazhi zbulohet se kanëqenë të pakujdesshëm.
Prokurorët në qytetin Termini Imerese, pranë Palermos, po hetojnë kapitenin dhe dy anëtarë të tjerë të ekuipazhit. Një hetim nuk nënkupton fajësi apo akuza formale. Prokurorët kanë thënë se hetimi do marrë kohë dhe do kërkojë nxjerrjen e rrënojave.
Oscar Seikaly, shefi i ndërmjetësit NSI Insurance Group, që ofron sigurimin e jahteve, vlerësoi vlerën e bykut në 40-70 milionë dollarë, por tha se mbulimi i P&I mund të mos arrijë më shumë se 100 milionë dollarë.
Sigurimi P&I do të mbulonte gjithashtu rikuperimin e ‘Bayesian’, tha Francesco Dubbioso, menaxher i vendit për Italinë për kompaninë e sigurimit Alta Signa Europe, që vlerësoi vlerën e superjahtit në 30 deri në 40 milionë dollarë.
Mbytja e ‘Bayesian’, ka habitur ekspertët të cilët thanë se anija ka qenë e ndërtuar për t’i bërë ballë një stuhie të forte.
