Ish-zëvendës shefja e shtabit të guvernatorit të Nju Jorkut, Kathy Hochul, është akuzuar se ka vepruar si agjente e qeverisë kineze.
Linda Sun, 41 vjeç, “veproi me urdhër, e drejtuar ose me kërkesë” të Pekinit në këmbim të miliona dollarëve ryshfet, dërgesa speciale në shtëpi të rosave të kripura dhe përfitime të tjera, sipas një aktakuze federale.
Prokurorët thonë se ajo dhe Christopher Hu, bashkëshorti dhe i pandehuri i saj, përdorën përfitimet e tyre të paligjshme për të blerë pasuri të paluajtshme dhe automjete luksoze.
Çifti u deklarua i pafajshëm për akuzat kundër tyre në një gjykatë federale në Bruklin të martën.
Zonja Sun u shkarkua gati dy vjet më parë pasi zyra e zonjës Hochul, e cila u bë guvernatore në vitin 2021, zbuloi “prova të sjelljes së keqe” dhe ia raportoi atë autoriteteve.
Ajo dhe zoti Hu tani përballen me akuza, duke përfshirë shkeljen e Aktit të Regjistrimit të Agjentëve të Huaj, mashtrim me viza, sjelljen e katër emigrantëve të paligjshëm dhe komplot për pastrim parash.
Prokurorët thonë se zonja Sun veproi si “një agjente e pazbuluar e qeverisë kineze”, ndërsa burri i saj “lehtësoi transferimin e miliona dollarëve në ryshfet për përfitime personale”.
Ajo supozohet se ka bllokuar përfaqësuesit e qeverisë së Tajvanit që të flasin me zyrtarët e Nju Jorkut, ka ofruar letra ftese të paautorizuara në SHBA për zyrtarët kinezë, ka ndryshuar në mënyrë të njëanshme mesazhet e zyrtarëve shtetërorë për Kinën dhe madje ka shtuar një zyrtar kinez në një konferencë private nëpërmjet telefonit të qeverisë në lidhje me përgjigjen e shëndetit publik ndaj Covid-19.
Christie Curtis, ushtruesja e detyrës së ndihmës drejtorit të FBI-së, tha se zonja Sun “përdori pozicionin e saj… për të promovuar në mënyrë të fshehtë” axhendën kineze, “duke kërcënuar drejtpërdrejt sigurinë kombëtare të vendit tonë”.
Në këmbim, prokurorët thonë se zonjës Sun iu dhanë shpërblime që arrijnë në miliona dollarë. Atyre iu dhanë gjithashtu bileta shfaqjeje, përfitime udhëtimi dhe ushqim, duke përfshirë, sipas aktakuzës, të paktën 16 vakte me rosë të kripur të stilit Nanjing të përgatitura nga kuzhinieri personal i një përfaqësuesi të qeverisë kineze dhe të dorëzuara në shtëpinë e prindërve të zonjës Sun.
Çifti pastroi shuma të mëdha parash për të blerë sende luksoze, duke përfshirë një Ferrari dhe prona në Hawaii dhe Nju Jork, shton aktakuza.
“Skema e paligjshme pasuroi familjen e të pandehurit në shumën e miliona dollarëve,” tha prokurori amerikan Breon Peace.
Sipas aktakuzës, zoti Hu operonte disa biznese në Nju Jork, duke përfshirë një eksportues ushqimesh deti, një dyqan vere dhe një konsulencë financiare, dhe shpesh mbështetej në shërbimet e një agjenti të autorizuar mallrash të qeverisë kineze.
Zonja Sun, një shtetase amerikane e natyralizuar e lindur në Kinë, kishte mbajtur poste të shumta të rangut të lartë në degën ekzekutive të shtetit dhe agjencitë shtetërore që nga viti 2012 dhe shërbeu si zëvendësshefe e stafit të zonjës Hochul për gati një vit përpara se të shkarkohej në 2023.
Zyra e guvernatorit tha se zonja Sun ishte punësuar fillimisht nga administrata e mëparshme e Andrew Cuomo, i cili dha dorëheqjen në gusht 2021 mes akuzave për sjellje të pahijshme seksuale.
“Ky individ u punësua nga dhoma ekzekutive më shumë se një dekadë më parë,” tha një zëdhënës për BBC.
“Ne e ndërpremë punësimin e saj në mars 2023 pasi zbuluam prova të sjelljes së pahijshme, raportuam menjëherë veprimet e saj te organet ligjzbatuese dhe kemi ndihmuar zbatimin e ligjit gjatë gjithë këtij procesi”.
Por një zëdhënës i zotit Cuomo i tha radios lokale WNYC se zonja Sun “kishte pak ose aspak ndërveprim” me guvernatorin e atëhershëm gjatë mandatit të tij, vetëm për t’u promovuar nga administrata Hochul.
Zonja Sun dhe zoti Hu u arrestuan të martën në mëngjes në shtëpinë e tyre në Long Island, me vlerë 3,5 milionë dollarë, afërsisht gjashtë javë pasi rezidenca u bastis si pjesë e një hetimi të FBI-së.
Në gjykatë të martën pasdite, zonja Sun u urdhërua të mos kishte asnjë kontakt me konsullatën dhe misionin kinez në Nju Jork.
Gjykatësi Brian Cogan vendosi gjithashtu se çifti do të kufizojë udhëtimin e tyre në qytetin e Nju Jorkut, lagjen Long Island dhe shtetet e Maine dhe New Hampshire.
Ai liroi zonjen Sun me kusht prej 1.5 milion dollarë dhe zotin Hu me detyrimin prej 500,000 dollarësh. Të dy do t’i raportojnë gjyqtarit më vonë këtë muaj.
