Një 19-vjeçar nga Fushë-Kruja ka mbetur i plagosur gjatë eksplorimit në Alpet e Korabit. I riu, K.S., dyshohet se është rrëzuar aksidentalisht në një terren të thepisur rreth orës 12:40.
Për shkak të terrenit të vështirë, autoritetet kërkuan ndërhyrjen e një helikopteri për transportimin e tij në Spitalin e Traumës, ku iu dha ndihma e parë.
Policia e Dibrës organizoi operacionin për shpëtimin dhe fton qytetarët të raportojnë çdo problematikë në numrin pa pagesë 112.
“Shërbimet e Komisariatit të Policisë Dibër, në bashkëpunim me Ministrinë e Shëndetësisë, i shkuan në ndihmë një 19-vjeçari, që u dëmtua gjatë eksplorimit të natyrës, në Alpet e Korabit.
Sot, rreth orës 12:40, në Alpet e malit të Korabit, duke eksploruar natyrën, dyshohet se aksidentalisht është rrëzuar dhe ka mbetur i dëmtuar shtetasi K. S., 19 vjeç, banues në Fushë-Krujë, i cili shoqërohej nga disa shtetas të tjerë.
Shërbimet e Komisariatit të Policisë Dibër, pas marrjes së njoftimit, menjëherë kanë organizuar punën për t’i ardhur në ndihmë 19-vjeçarit.
Për shkak të terrenit të vështirë dhe të thepisur është kërkuar ndërhyrja e helikopterit, me qëllim ofrimin e ndihmës për shtetasin e dëmtuar.
Pas dhënies së ndihmës së parë, 19-vjeçari, është transportuar me helikopter, drejt Spitalit të Traumës.
Policia e Dibrës është e angazhuar maksimalisht në shërbim të qytetarëve dhe vizitorëve, dhe i fton ata që për çdo problematikë që mund të hasin, të telefonojnë në numrin pa pagesë 112.”– njofton policia.
